Pinakbet latta, karruba!

Pinakbet a bungat’ sili ken okra [saluyot-kayo] a naigisaran bassit iti taba ken lasag ti baboy. Makaanayen a pareha ti innapuy, piman.

'Maykan ta agdanggayta man a mangan, karruba.

[wwwmangantayonkarruba.blogspot.com]

Nilingta a Malaga

 

Il-iliwen met datao ti agsida iti nilingta a Malaga (Spinefoot), piman. Naimas, nananam ken adut’ maibulonna nga innapuy aglalo no kastoy a mangrugin a lumamiis ti tiempo.

'Maykayon ta paganusantayo ti nanumo a sida, karruba!

[wwwmangantayonkarruba.blogspot.com]

Pinakbet manen, piman

 

Pinakbet a bungat’ sili ken okra [saluyot-kayo] a nalaokan iti bassit a taba ken lasag ti baboy. Daytoy ti sida nga anusan nga ikammet iti innapuy ita. Ay, kastoy latta ti sida dagiti pada a tagaaw-away, piman.

'Mayka man ta danggayannak a mangan, karruba!

[wwwmangantayonkarruba.blogspot.com]

Berde latta. Salad man...

Salad a bulong ti marunggay, sabong ti katuday [ken marunggay], ken rangaw ti paria ti ibulon iti innapuy. Piman a sida, ngem nasustansia.

Mayat latta. ‘Maykayon ta pagraramanan, ala!

[wwwmangantayonkarruba.blogspot.com]

Adobo nga Uong

 

Daytoy ti pamedped iti bisin, adobo nga uong. Nasukainak laeng iti pagpupokan ti taraon ti bagi.

Nabaknang a taraon. Nasustansia iti protina. Paggaayat a sida dagiti pada a nangisit ti sikona. 'Maykan dimo baybayagen, karruba!

[wwwmangantayonkarruba.blogspot.com]

Tinuno a bungat' sili ti isublat

Tinuno a bungat’ sili ti ipareha iti innapuy ita. Anusan ti nanumo a sida, piman. Ne, pada a nangisit ti sikona, ‘maykayon ta pagraramanan ti adda...

'Maykan, karruba!

[wwwmangantayonkarruba.blogspot.com]

Nateng ken Lames, mayat latta

Nagisar a rangaw ti balangeg iti sangkatedted a manteka ken nalaokan iti lakaylakay [nagtipon ti natadtad a bungat' sili ken bukel ti bawang] ken bugbugtong a prito a tilapia ti iludonludonko iti innapuy ita napia la a pangpelpel iti agik-ikkis a tian. Umanayen ti suyo ken artem a suka ti Iloko a pangidumudoman ti prito, piman.

Anusan ti sida, karruba.

[wwwmangantayonkarruba.blogspot.com]

Nateng latta

Nateng latta ti ibulon iti innapuy. Ket wen, diak kauma. Nagimas man nga arub-oben nga igupen ti digo ti bulong iti marunggay, bungat' paria, okra, [saluyot-kayo], pallang ken sabong ti katuday a nasagpawan pay iti prito a galunggong nga ad-adda a mangpasabor ti ramanna.

Piman ngem nasustansia a sida. 'Maykayon, karruba!

[wwwmangantayonkarruba.blogspot.com]

Kilawen ken salad, mayat

Kilawen a pasayang ken salad a susop ti saba ti agpareha ita. Nupay dida agkasurotan, awan mabalin ta iludonko ida iti innapuy. Imasen lattan ken uray 'nia ditan a pamelpel iti tian ta napia la a pamigsa ti bagi nga agtrabaho no rabii. Piman.

'Maykan pada a mangrabrabii nga agsapsapul iti pangtaraon ken pangbiag ti bagi ta mangantan, ne...

[wwwmangantayonkarruba.blogspot.com]

Pinakbet latta ti ipelpel iti tian

Pinakbet manen ti sida nga ipelpel iti tian, piman. Imasen ngem manso!

Diak kauma.

Ala wen, anusan ti bungat' okra [saluyot-kayo], pallang ken paria nga adda bassit burluloyna a lasag ken taba ti baboy ken nasagpawan pay iti pasayan[g].

'Maykayon, karruba!

[wwwmangantayonkarruba.blogspot.com]

Pinakbet a puro bungat' tarong

Nateng latta manen, piman-- pinakbet a puro bungat' tarong

a nasagpawan iti aramang. Anusan ti kinanumo ti sida.

'Maykayon, karruba!

[wwwmangantayonkarruba.blogspot.com]

Nateng latta manen

Pangaldaw mammet gayamen, aya? Nagalistot' oras.

Ngem ne, agiguptay' man ketdi iti digo ti bulong ti marunggay, susop ti saba ken bungat' okra [saluyot-kayo] ta napia la nga adda pamigsa dagiti susuop, lasag ken tulang a nakigabbu a nagsapul iti pangtaraon ti bagi idi rabii, piman.

'Maykan ket naimas ti maragatas a digo, karruba!

[wwwmangantayonkarruba.blogspot.com]

Pinakbet manen

Ket wen, daytoy manen. Daytoy ti pagipapasan nga ibulon iti innapuy—pinakbet a bungat’ tarong, paria ken utong a nasagpawan bassit iti chicharon baboy (nakarahay/bagnet). Anusan kinanumo ti sida, piman.

‘Maykayon,karruba!

[wwwmangantayonkarruba.blogspot.com]

Awan mainaganko...

Bukod a partuat a klase ti luto. Adda nateng, seafoods ken karne. Pinagtitiponko. Sangsangkamaysa. Awan mainaganko no aniat’ klasena. Gapu ta bukod nga estilo ken partuat, naimas latta ti luto.

Dikan baybayagen. Umaymo ramanan, karruba!

[wwwmangantayonkarruba.blogspot.com]

Presko a lasag ti baka

Kilawen mammet ti isublat nga ikammet iti innapuy la. Saanak met ketdi mauma iti nateng ngem ala, pasublaten ti karne nga ipauneg.

Wen pupus wenno sidaen, mabalin ti pinapaitan a presko a lasag ti baka nga iludonludon iti innapuy, piman. Lipaten ti gout. Ikidem ti ut-otna no kidagenna. Nanamen ketdi ti imasna. Sige, manso. Tira! Apay, maatipam aya ti rikna a di sumakmol no sulisogennaka?

'Maykayon ta ikirastayo, karruba!

[wwwmangantayonkarruba.blogspot.com]

Agiguptay' iti digo, apo!

 

Ney! Pangngaldaw mammet gayamen. Nagalistot' oras, aya? Ket wen, agiguptay’ man ketdi iti digo ti bulong ti marunggay, okra [saluyot-kayo] ken bungat’ utong a nasagpawan iti prito a tilapia.

Anusan ti sida, karruba. 'Maykayon, ne!

[wwwmangantayonkarruba.blogspot.com]

Tinuno a baboy

Daytoy ti nasalawko dita ref nga iluto. Tinuno [insarbasab] a lasag ken taba ti baboy. Nabayag metten a diak nakaraman iti kastoy aglalo no awan ti agpauraga, piman. Ala wen, sagpaminsan met lang a malanitan ti boksit iti daytoy a klase ti luto. Apay, sino koma ti mangiparit ti agsida iti kastoy no agik-ikkisen ti boksit iti bisinna? Ti nakikappengan a kua? Hu, baam man!

Planok a pulotanen ngem nasaysayaat la unay no inkammet lattan ta sigurado nga adu ti maibulonna nga innapuy.

‘Maykayon, karruba! Anusan ti adda a sida.

[wwwmangantayonkarruba.blogspot.com]

Liningta a lames-taaw latta

Liningta a mataan [akule]. Manso latta ti lames-taaw a sida nga ipareha iti innapuy bareng dida aginnuma, piman. Anusan ti kinanumona.

'Maykayon ta mangantayon, karruba!

[wwwmangantayonkarruba.blogspot.com]

Lames-taaw ti isublat a sida

Lames-taaw ti isublat nga ibulon iti innapuy: nakirog iti bassit a manteka ti baboy a kippi a naipareha iti liningta a tilapia. Mayat latta basta adda pamedped ti bisin, piman. 

'Maykayon, ne!

[wwwmangantayonkarruba.blogspot.com]

Luto a diak ammo ti pangawagko

Pangdarasan a luto. Wen, luto dagitay pada nga aglaladut nga agluto wenno dina talaga kayat ti agluto, piman. Ngem ney, no maramanam daytoy a klase ti luto, amangan no subliasublianam a sapsapulen.

Simple met la ket a luto, a. Alisto ti preparasionna. Kastoy nay: tufo a nalaokan iti pasayang ken uong, napatedtedan iti red wine [mabalin met ti white wine], bassit a corn starch, ginisa mix ken naiwa a bulong ti lasona.

Kinaagpaysuananna, diak pay ketdi ammo no aniat' pangawagko daytoy a luto, piman. Ngem no damagem no kasanot' pananglutok, dayta ket bukodko a bersion. Makaammokay' metten ti bukodyo nga estilo.

Neay, iyayabko lattan. Mangantayon, karruba!

[wwwmangantayonkarruba.blogspot.com]

Liningta a Butterfish

Daytoy man liningta a butterfish ti isublat nga ikammet iti innapuy, piman. Mapausanak a makaraman manen iti daytoy ta nabayag metten daydi naudi a panagsida. Ala wen, mansuen man ketdi.

'Maykayon ta pagraramanantayo, karruba!

[wwwmangantayonkarruba.blogspot.com]

Nateng met la ketdi, a.

Hus! Daytoy lattan ti nanumo a pangaldaw, piman. Nateng met la ketdi, a. Wen, pinakbet. Imbag la ketdin ta adda pay nabati iti sin'dami a pinangrabii ken ni baket numuna ket masadutak nga agluto. Ngem perme ti panangustok iti daytoy a luto. Luto ngamin ni baket. Sabali laeng ti luto ti kaingungot, hekhek!

[wwwmangantayonkarruba.blogspot.com]

Sinigang a mataan

Sinigang [Paksiw] a Mataan [Akule] a nasagpawan iti bungat' sili ken bulong ti lasona. Awan adu a burluloyna, makaanayen dayta. Pangdengngep bareng agsardeng ti agkirkiraos a tian. Anusan manen ti sida, piman.

'Maykan ta agigupta iti digo, karruba!

[wwwmangantayonkarruba.blogspot.com]

Liningta a galunggong mammet ti isublat

Pangdarasan nga isakmol, piman: liningta a galunggong [Baby Layang Scad] ti ikammet iti innapuy. Anusan manen ti nanumo a sida.

Ngem ala, umaykayon ta mangantayo, karruba!

[wwwmangantayonkarruba.blogspot.com]

Kalebban nga adobo a kalding

Kalebban lattan ti pangaldaw ta masadutak nga agluto. Makaanayen daytoy adobo a kalding nga ipareha iti innapuy, piman. Ket wen, inlibasko nga in-ziploc ti lima tupek a luppo iti panagkasangay ni kabagis idi rabii. Imbag ta awan nakakita kaniak, hehe.

Anusan, a.

[wwwmangantayonkarruba.blogspot.com]

 

Katuday man

 

Kapigsa nga agsabong ti katuday ngem ti problema,

natatayag unayen dagiti sangana. Ti dadduma,

aglumbay iti uneg ti inaladan ti karrubak isu a kapilitan

a putdek dagiti atitiddog ken natatayag a sangana.

Awan mabalin. Agsaringitto. Mangabaroanan.

[wwwmangantayonkarruba.blogspot.com]

Kalamansi

Perme a kaadu ti bunga ti mula a kalamansi.

Ay wen, napia la a pangalsem ti maluto

a sida wenno kumporme dita a pagrekado 

ti maisaang iti dalikan ken masukaan.

[wwwmangantayonkarruba.blogspot.com]