Tamnay ken apgad a sida

 

Ket kas kadawyan dagiti pada a mamirmiraut a taga-away, piman, ad-adda a nateng ti kanayon a kapulpulapol iti lamisaan. Ngem ala wen, agiguptay' iti digo ti bulong ti marunggay, bungat' paria ken okra [saluyot-kayo] nga imparehak iti bugguong nga unnok a mangbalanse ti tamnay ken apgad a raman ti sida.

'Maykan, karruba!

[wwwmangantayonkarruba.blogspot.com]

Tinuno a bungat' sili

 

Nakamatisan ken nabugguongan a tinuno a bungat’ sili ti ibulon iti innapuy. Ay, napia la a pamedped ti bisin, piman. Anusan latta, pagyamanan ti adda...

'Maykayon, karruba!

[wwwmangantayonkarruba.blogspot.com]

Namarinada a payyak ti manok

Namarinada [Nayuper/Naupran iti suyo, sangkatedted a suka, cooking wine, bawang, bukel ken bulong ti paminta] a payyak ti manok [Chicken Wings] ti isublat a pagpapasan. Sagpaminsan met a ramanan ti kastoy a luto ta diak lattan im-imutan ti bagi, piman.

Ala wen. 'Mayyo ramanan, karruba!

[wwwmangantayonkrruba.blogspot.com]

Nateng latta

Nateng latta ti pagpapasan. Agigup iti digo ti bulong ti marunggay ken saluyot ken adda bassit laokna a rabong (bamboo shoot).

Nanumo ngem nasustansia, piman.

Ala wen, 'maykayon makiigup, karruba!

[wwwmangantayonkarruba.blogspot.com]

Chicken Rotisserie

Gapu ta di met masango ti agluto, daytoy ti nagammatak

a masida dita store--Chicken Rotisserie. Pangalistoan

nga isakmol, piman.

[wwwmangantayonkarruba.blogspot.com]

Bulong ti nateng, bulong ti lames

Daytoy man puro bulong ti sidaen ken igupen digona ita: uggot ti balangeg a nasagpawan sangkabassit a piraso iti uong ken bulong ti lames-- wen, prito a bulongnas.

Mayat a kombinasion a taraon a pagpapigsa dagiti pada a mangrabrabii nga agtrabaho, piman.

Ala wen, 'maykayon karruba!

[wwwmangantayonkarruba.blogspot.com]

Adda manen nayon a pakbetek

 

Nagsangpetak itay bigat a nagbukitkit ti mula a paria iti hardin ti taraon ti bagi apaman a nakasangpetak a naggapu iti trabaho. Ugalik nga aramid dayta kalpasan a maruk-atakon dagiti taraken nga aso iti kulonganda. Ket dayta man ne, nakapurosak manen iti sangadakulapan a bungat' paria. Gapu dayta, nakaurnongankon iti medium-size ziploc a kaadu ti bungana a napurosko iti binigat. Makaanayen a pakbetek, piman.

Ala wen.

[wwwmangantayonkarruba.blogspot.com]

Napait ken nagasang

 

Daytoy latta manen, a. Piman...

Wen, ngem ana ngata ti ramanna no agtipon ti napait ken nagasang?

Padasen ti ageksperimento. Dayta ti pili a sida ita, nagisar a bungat' paria nga adda laokna nga uong iti sardinas a nagasang.

Hu! dimo kuna ta pinatedtedak bassit iti cooking wine ken nawarakiwakan iti bulong ti lasaona.

Solved!

Ala, 'maykan ta pagrararaman ti nanumo a sida, karruba!

[wwwmangantayonkarruba.blogspot.com]

Itlog, pasayang ken bungat' paria

Daytoy ti naladaw a pammigat ken nasapa a pangaldawko. Taraon dagiti pada a mamirmiraot: nagisar iti sangkatedted a manteka ti nabatil nga itlog, pasayang ken bungat' paria. Anusan, a, piman.

No maminsan, kasla raman ti paria ti kapait ti biag, di ngamin karruba?

[wwwmangantayonkarruba.blogspot.com]

Iti Hardin ti Taraon ti Bagi

 

Ana ngata aya, sukdalek wenno pukanen? Kasano ket nagngato met manen ti sanga ti katuday, perme met gayamen ti tayag ti kalamansi numuna ket nagadu ti bungana, uray ti bayawas, ti guakol.

[wwwmangantayonkarruba.blogspot.com]

Nateng latta

Nateng latta. Pinakbet a bulong ti saluyot

ken bungat' sili. Anusan manen, piman.

[wwwmangantayonkarruba.blogspot.com]

Dinengdeng latta...

Dinengdeng latta. Di kauma. Ket wen, agiguptay' iti digo

ti bulong ti marunggay ken paria a nalaokan iti bagas

ti lampaka. Anusan ti nanumo a sida, piman.

'Maykayon pada a nangisit ti sikona a karrubak

ta pagraramanan ti adda.

[wwwmangantayonkarruba.blogspot.com]

Pinakbet a sili ken delata a baka

Pinakbet a puro bungat' sili nga adda laokna bassit a bulong ti 

saluyot a pangpagalis a tilmonen a naipareha iti delata a baka [corned beef] a naikiwar iti sangkatedted a manteka ti baboy ken inasmangak pay iti bulong ti pechay. Mayat a kombinasion, adu la ketdi ti maibulonna nga innapuy. Paganusan manen ti sida, piman.

'Maykan pada a nangisit ti sikona ta pagraramanan ti nanumo a sida. Karruba!

[wwwmangantayonkarruba.blogspot.com]

Bungat' paria iti hardin

Sangadakulapan a bungat' paria a napuros iti hardin a taraon ti bagi. Ay, makaurnong met. Addanto pakbetek, piman.

[wwwmangantayonkarruba.blogspot.com]