Bukod a bersion ti "sisig"

Simple ken nanumo a presentasion ti bukod a kabaelan. Bukod a bersion ti awaganda iti "sisig."

Ala, pagraramanan. 'Maykayon, karruba!

[wwwmangantayonkarruba.blogspot.com]

Katuday man

 

Kapigsa nga agsabong ti katuday ngem ti problema,

natatayag unayen dagiti sangana. Ti dadduma,

aglumbay iti uneg ti inaladan ti karrubak isu a kapilitan

a putdek dagiti atitiddog ken natatayag a sangana.

Awan mabalin. Agsaringitto. Mangabaroanan.

[wwwmangantayonkarruba.blogspot.com]

Kalamansi

Perme a kaadu ti bunga ti mula a kalamansi.

Ay wen, napia la a pangalsem ti maluto

a sida wenno kumporme dita a pagrekado 

ti maisaang iti dalikan ken masukaan.

[wwwmangantayonkarruba.blogspot.com]

 

Namagusto manen ti dragonfruit

Pinadalanak a bigbigat ti mula a dragonfruit, ket ney, nasdaawak ta adu met gayam bungana-- ken naluomda payen, piman. Kitaem kadi lang, iti kinabisi datao iti trabaho, dimo payen masirpat dagiti mula.

Ala wen, pagyamanan manen iti parabur nga imburaymo. Dika maum-uma, wen?

[wwwmangantayonkarruba.blogspot.com]
 

Adda manen nayon a pakbetek

 

Nagsangpetak itay bigat a nagbukitkit ti mula a paria iti hardin ti taraon ti bagi apaman a nakasangpetak a naggapu iti trabaho. Ugalik nga aramid dayta kalpasan a maruk-atakon dagiti taraken nga aso iti kulonganda. Ket dayta man ne, nakapurosak manen iti sangadakulapan a bungat' paria. Gapu dayta, nakaurnongankon iti medium-size ziploc a kaadu ti bungana a napurosko iti binigat. Makaanayen a pakbetek, piman.

Ala wen.

[wwwmangantayonkarruba.blogspot.com]

Iti Hardin ti Taraon ti Bagi

 

Ana ngata aya, sukdalek wenno pukanen? Kasano ket nagngato met manen ti sanga ti katuday, perme met gayamen ti tayag ti kalamansi numuna ket nagadu ti bungana, uray ti bayawas, ti guakol.

[wwwmangantayonkarruba.blogspot.com]

Bungat' paria iti hardin

Sangadakulapan a bungat' paria a napuros iti hardin a taraon ti bagi. Ay, makaurnong met. Addanto pakbetek, piman.

[wwwmangantayonkarruba.blogspot.com]

 

Nateng ken unnok, mayat!

Hu! Daytoy lattan ti pangdarasan a sida: [na]salad a sabong

ti katuday, rangaw ti paria ken ilay-sanglay [alugbati] ken

adda sangabukel a bungat' paria ken maysa ramayan nga utong.

Linaokak iti kamatis ken lasona.

Daytoy ti pagsayaatanna no adda mula a nateng iti hardin

ti taraon ti bagi, adda nakasagana a burasen wenno purosen

a paglaok iti kumporme a maluto a masida.

Saan la a dayta, inasmangak ti salad iti binugguongko nga unnok.

Mayat ti balanse ti ramanna, piman.

'Maykayon, karruba!

[wwwmangantayonkarruba.blogspot.com]

Parabor ti mula a paria

Kastoy ti kaadu ti napuros ni baket a bunga ti paria, dua nga aldaw

ti napalabas. Kastoy mammet manen ti napurosko itay pinadalanak a bigbigat. Balor dua agingga tallo doliar iti medium size a ziploc no gatangen iti store. Imbag la ketdin ta adda mula isu pay a sekdanan a gatangen numuna ket nagngina metten amin a magatang, piman.

Ay! Uray kunak nga "i’m living in a bitter life" basta dikay' maum-uma a mangted iti paraboryo, wen?

Pagyamanan!

[wwwmangantayonkarruba.blogspot.com]

Iti hardin ti taraon ti bagi

Dayta man ti napurosko itay bigat iti hardin ti 

taraon ti bagi: sabong ti katuday, rangaw ti kamotig 

ken lima piraso a bunga ti paria. Ay, anusan 

ti adda napia la nga adda nayon ti masida.

Saladek, piman.

[wwwmangantayonkarruba.blogspot.com]

 

Dagiti Ala a Ladawan iti Hardin Ita nga Aldaw

Pinadalanak met dagiti mula a taraon ti bagi

iti hardin itay bigat, adda met napurosko a sabong 

ti katuday napia la a paglaok iti maluto a sida. 

Uray ti mula a pias, adu metten ti bungana. 

Adda pangalsem iti sida. Narukbos met ti kamotig

ken natayagen ti maysa pay a mula a kalamansi. 

Mayat, tira. Pagyamanan dagitoy a paraburyo.

Dikay' maum-uma.

[wwwmangantayonkarruba.blogspot.com]

 

Pinakbet latta

Dagus a linutok ti napurosko a bungat' mula a tarong iti hardin ti bagi, piman. Pinakbetko a purpuro. Narigaten no baybayagen...

'Maymo ramanan, karruba!

[wwwmangantayonkarruba.blogspot.com]

 

Kardis

sabong, sabong

agawaam agsabong

tapno adda purosen

a bungat’ paraburmo.

.

.

.

.

kardis

hardin ti wailuku

mar. 21 peb. 2o23

[wwwmangantayonkarruba.blogspot.com]

 

Marunggay [Marunggi]

ala, sika man. no dadduma,

iwalindakat' kaaduan

iti pagguummongan-punsionan

ngem ti bagi sikat' pakataraonan--

pagbiagan mamirmiraut a kas kaniak

wen, agsampagaka latta

iti hardinko agingga a siak ti mauma...

.

.

.

ita nga aldaw

marunggay[marunggi]

mar. 21 peb. 2o23

wailuku

[wwwmangantayonkarruba.blogspot.com]

 

Sili ti sairo

Adda manen napurosko a naluom 

a bungat' natibo a silit' sairo [squirrel]

ditoy hardin ti taraon ti bagi. 

Nagkalatkat ti mula a patani kenkuana 

ngem awan met makitak a sabongna la koma.

Yurayko.

[wwwmangantayonkarruba.blogspot.com]

 

Arabic Coffee

Maudin a bunga ti Arabic Coffee sakbay nga aggibus

ti tawen. Ngem padaanak ti ad-adu pay a bunga ti paraburna.

[wwwmangantayonkarruba.blogspot.com]

 

 

Adda met tallo a bunga ti mula a tarong

Iti awan a tiempo a mangdalus iti lawlaw daytoy mula

a tarong, nakapagbunga met pay la, piman. 

Adda tallo a bunga a paraburna napia la a paglaok

iti kumporme a maluto a masida. Alaw wen, agyaman!

[wwwmangantayonkarruba.blogspot.com]

Nagsabong, nagbunga ti mula a kardis

Mayat met ti panagsabong ken panagbunga daytoy mula

a kardis iti hardin ti taraon ti bagi, piman.

Ala wen, dika maum-uma.

[wwwmangantayonkarruba.blogspot.com]

Kalamansi

Uray met daytoy mula a kalamansi, di pay nagsardeng

a mangmangted iti paraburna manipud idi narugianna

ti nagbunga, piman.

Ala wen, pagyamanan napia la nga adda pangalsem

ken pagtempla kadagiti maluto a sida.

[wwwmangantayonkarruba.blogspot.com]

 

Adda manen mapuros a sabong ti katuday

 

Ket wen, adda manen mapuros a sabong ti katuday 

napia la a paglaok iti kumporme a maluto a masida, piman.

Agyaman iti paraburmo!

[wwwmangantayonkarruba.blogspot.com]