Lames-taaw ti isublat a sida

Lames-taaw ti isublat nga ibulon iti innapuy: nakirog iti bassit a manteka ti baboy a kippi a naipareha iti liningta a tilapia. Mayat latta basta adda pamedped ti bisin, piman. 

'Maykayon, ne!

[wwwmangantayonkarruba.blogspot.com]

Luto a diak ammo ti pangawagko

Pangdarasan a luto. Wen, luto dagitay pada nga aglaladut nga agluto wenno dina talaga kayat ti agluto, piman. Ngem ney, no maramanam daytoy a klase ti luto, amangan no subliasublianam a sapsapulen.

Simple met la ket a luto, a. Alisto ti preparasionna. Kastoy nay: tufo a nalaokan iti pasayang ken uong, napatedtedan iti red wine [mabalin met ti white wine], bassit a corn starch, ginisa mix ken naiwa a bulong ti lasona.

Kinaagpaysuananna, diak pay ketdi ammo no aniat' pangawagko daytoy a luto, piman. Ngem no damagem no kasanot' pananglutok, dayta ket bukodko a bersion. Makaammokay' metten ti bukodyo nga estilo.

Neay, iyayabko lattan. Mangantayon, karruba!

[wwwmangantayonkarruba.blogspot.com]

Liningta a Butterfish

Daytoy man liningta a butterfish ti isublat nga ikammet iti innapuy, piman. Mapausanak a makaraman manen iti daytoy ta nabayag metten daydi naudi a panagsida. Ala wen, mansuen man ketdi.

'Maykayon ta pagraramanantayo, karruba!

[wwwmangantayonkarruba.blogspot.com]

Nateng met la ketdi, a.

Hus! Daytoy lattan ti nanumo a pangaldaw, piman. Nateng met la ketdi, a. Wen, pinakbet. Imbag la ketdin ta adda pay nabati iti sin'dami a pinangrabii ken ni baket numuna ket masadutak nga agluto. Ngem perme ti panangustok iti daytoy a luto. Luto ngamin ni baket. Sabali laeng ti luto ti kaingungot, hekhek!

[wwwmangantayonkarruba.blogspot.com]

Sinigang a mataan

Sinigang [Paksiw] a Mataan [Akule] a nasagpawan iti bungat' sili ken bulong ti lasona. Awan adu a burluloyna, makaanayen dayta. Pangdengngep bareng agsardeng ti agkirkiraos a tian. Anusan manen ti sida, piman.

'Maykan ta agigupta iti digo, karruba!

[wwwmangantayonkarruba.blogspot.com]

Liningta a galunggong mammet ti isublat

Pangdarasan nga isakmol, piman: liningta a galunggong [Baby Layang Scad] ti ikammet iti innapuy. Anusan manen ti nanumo a sida.

Ngem ala, umaykayon ta mangantayo, karruba!

[wwwmangantayonkarruba.blogspot.com]

Kalebban nga adobo a kalding

Kalebban lattan ti pangaldaw ta masadutak nga agluto. Makaanayen daytoy adobo a kalding nga ipareha iti innapuy, piman. Ket wen, inlibasko nga in-ziploc ti lima tupek a luppo iti panagkasangay ni kabagis idi rabii. Imbag ta awan nakakita kaniak, hehe.

Anusan, a.

[wwwmangantayonkarruba.blogspot.com]

 

Katuday man

 

Kapigsa nga agsabong ti katuday ngem ti problema,

natatayag unayen dagiti sangana. Ti dadduma,

aglumbay iti uneg ti inaladan ti karrubak isu a kapilitan

a putdek dagiti atitiddog ken natatayag a sangana.

Awan mabalin. Agsaringitto. Mangabaroanan.

[wwwmangantayonkarruba.blogspot.com]

Kalamansi

Perme a kaadu ti bunga ti mula a kalamansi.

Ay wen, napia la a pangalsem ti maluto

a sida wenno kumporme dita a pagrekado 

ti maisaang iti dalikan ken masukaan.

[wwwmangantayonkarruba.blogspot.com]

 

'Maykayon ta agiguptayo iti digo, karruba!

Daytoy man impadawat ti gayyemko a lames ti diguak. Kunana a birut. Kunak met iti nakemko, "bukton sa met."

Basta. Daytoy digona ti igupek ita. 'Maykayon, karruba!

[wwwmangantayonkarruba.blogspot.com]

 

Lauya a luppo ti baboy

Daytoy mammet ti isublat nga arub-oben ti digona, lauya a luppo ti baboy a nalaokan ti repolio. Sagpaminsan met a ramanan no adda mairana ta di pimpiman lattan ti boksit.

Ala wen, 'mayyo ramanan ti nasabor a digona, ne.

[wwwmangantayonkarruba.blogspot.com]

Namagusto manen ti dragonfruit

Pinadalanak a bigbigat ti mula a dragonfruit, ket ney, nasdaawak ta adu met gayam bungana-- ken naluomda payen, piman. Kitaem kadi lang, iti kinabisi datao iti trabaho, dimo payen masirpat dagiti mula.

Ala wen, pagyamanan manen iti parabur nga imburaymo. Dika maum-uma, wen?

[wwwmangantayonkarruba.blogspot.com]
 

Pinakbet a saluyoot

Pinakbetko ti kakaisuna a bulong ti nateng a nakapupok

iti reprigerator, piman. Pinakbet a puro bulong ti saluyot.

Inalsemak bassit, mayaten. Addan pamedped iti bisin.

'Maykan pada a nangisit ti sikona ta ikirastayo ti nanumo a sida.

[wwwmangantayonkarruba.blogspot.com]

Prito a tilapia

Pangbuena mano a sida daytoy prito a tilapia a nasagpawan ti nagisar iti apagdillaw a manteka a bungat' okra ken nawarakiwakan iti bulong ti lasona ken natadtad a bukel ti bawang ken bungat' sili [lakaylakay kunami] ita ta natappoganen ti bulan ti Setiembre.

Mangrugin a lumamiis ti tiempo. 'Maykan ta mangantayo, karruba!

[wwwmangantayonkarruba.blogspot.com]