Liningta a bukto

 

Bukto ti nasalaponko a ginammatan idi napanak iti store 

itay kallabes nga aldaw. Nairana nga adda lakoda. Nagngina ngem inkidemko ti bayadna. Liningtak ta mapausanak unay nga agsida 

ti kastoy ta nabayag metten daydi naudi a panagsidami ken ni baket. Panagkunak, umanayen daytoy a pamedped iti bisin, piman.

Iyayabko lattan kadakayo a mayat nga umay makipangan kaniak, ne!

[wwwmangantayonkarruba.blogspot.com]

'Maykayon, karruba!

 

Ket kas kadawyan dagiti pada a taga-away 

a mamirmiraut, piman, ad-adda a nateng

ti kanayon a kapulpulapol iti lamisaan. 

Ngem ala wen, agiguptay' iti digo ti bulong

ti marunggay, bungat' paria ken saluyot-kayo

ken imparehak iti bugguong nga unnok a mangbalanse

ti tamnay ken apgad a raman ti sida.

'Maykan, karruba!

[wwwmangantayonkarruba.blogspot.com]

Paksiw a baka latta

 

PAKSIW A BAKA. Wen, paksiw wenno nadiguan/diniguan

a karnet' baka ti sida ken pangibulon iti innapuy ita.

Nupay adda kapkapuy ti pinapaitanna, agiguptay' man latta

iti digo ta napia la a pangriing ti agdudungsa a rikna

a nagpuyat a nagtrabaho idi rabii, piman.

'Maykayon ta agpaling-ettayo, karruba!

[wwwmangantayonkarruba.blogspot.com]

Natuno a namarinada a payyak ti manok

 

Natuno a marinated [wenno namarinada, nayuper 

wenno naupran iti suyo, sangkatedted a suka, 

cooking wine, bukel ti bawang ken bulong ti paminta] 

a chicken wings [payyak ti manok] ti isublat nga ipareha 

iti innapuy. Sagpaminsan met a ramanan ti kastoy 

a klase ti luto ken sida ta diak lattan im-imutan ti bagi, piman.

Ala wen, ne. 'Maykayon, karruba!

[wwwmangantayonkarruba.blogspot.com]

Bukod a bersion ti tako poke

 

Daytoy man ti inkiras a pupus dagiti Sunday Boys of Maui

idi rabii, bukod a bersion ti Tako Poke [Squid Chunks].

Wen, bukod nga estilo ti pannakaisagana, pannakatempla ken

panagraman.

Simple lang ti nausar a panempla: soyo [Kikoman],

Poke Mix, Sesame Oil, Kim Chee Base, immitation crab,

bulong lasona ken sibuyas.

'Maykayon ta ramananyo, karruba!

[wwwmangantayonkarruba.blogspot.com]

Opihiiiiiiii!

 

Oh, oh, opihiiiiiiiiiiiiiiii!

Ala wen, isublat mammet daytoy a sida.

Nabayag la daydi naudin a pannakaraman

kadaytoy a taraon ti taaw, piman.

'Maykayon, karruba!

[wwwmangantayonkarruba.blogspot.com]

Pinakbet manen!

Pinakbet manen. Wen, pinakbet a bulong 

ti saluyot ken bungat' sili ti sida. 

Sinagpawak iti Butter Fish a mangbalanse

ti ramanna.

Diak kauma uray kanayon a pinakbet ti sida.

Dayta ti maipannakkeltayo a nangisit ti sikona.

Iyayabko kadakayo, karruba. 'Maykayon!

[wwwmangantayonkarruba.blogspot.com]

 

Liningta a tilapia

 

Liningta a tilapia ti pareha ti innapuy.

Lames manen ti sida, piman. Ngem manso,

tira latta.

'Maykayon, karruba!

[wwwmangantayonkarruba.blogspot.com]

Silit' Sairo

Ket ney adu mammet ti bunga

daytoy mula a sili ti sairo

ditoy hardin ti taraon ti bagi.

Ala wen.

[wwwmangantayonkarruba.blogspot.com]

 

Pinakbet manen

Nateng manen ti sida...

Wen ta kalpasan ti walo nga oras a nagpatnag

a trabaho, paksuy ti narikna datao. Perme

a bannog, piman. Ngem tapno adda sukat ti 

ling-et a naiparuar, agsidatayo man ketdi

iti nateng. Wen, nateng manen ti sida 

ket anusan ti pinakbet a bulong ti saluyot

ken bungat' sili bareng bungarenna

ti agtugtuglepen a mata. 

Ala 'maykayon, ne!

[wwwmangantayonkarruba.blogspot.com]

 

Pinablad a balatong

 

Pinablad a balatong ti sida, karruba.

Wen yantangay adda mula a paria ken katuday

iti hardin ti taraon ti bagi, nangpabladak iti balatong. 

Nangigisarak bassit iti karne [ken taba] ti baboy, 

nangrakemak iti aramang, inimaritak ti bulong ti paria

ken sabong ti katuday sako inlaok iti daytoy linutok.

No riingenna ti gout-ko, babaam man. Naimas man

ti maiparit, di ngamin karruba?

'Maykayon ta ikirastayo ti sida!

[wwwmangantayonkarruba.blogspot.com]

Adobo a kurita: Ilocano style

 

Daytoy man ti pagpapasan a sidaen datao, piman,

adobo a kurita. Ilocano Style.

Bukod nga estilo a luto ti adobo a kurita

ta naluto iti sangkabassit a suyo, cooking wine,

adobo mix, ginisa mix, bulong ken bukel

ti paminta ken bawang. Medyo anemic bassit 

ti langana ngem anusanen napia la a pamedped

iti bisin.

'Maykayon ta umayyo man ramanan no mayat met laeng,

karruba!

[wwwmangantayonkarruba.blogspot.com]

Pinakbet a puro bulong ti saluyot

 

Pinakbetko ti kakaisuna a bulong ti nateng 

a nakapupok iti ref, piman. Pinakbet a puro bulong

ti saluyot ti lutona. Inalsemak bassit, mayaten.

Addan pamedped iti bisin.

'Maykan pada a nangisit ti sikona ta ikirastayo

ti adda a sida. Karruba!

[wwwmangantayonkarruba.blogspot.com]

Nateng manen

Kalpasan panagigup iti digo ti lauya a baka

idi kalman, isublat ti nateng. Wen, nateng

manen ti pagpapasan. Agigup iti digo 

ti bungat' utong ken paria, bulong ti saluyot

ken sabong ti katuday. Pamigsa datao a nagpuyat.

'Maykan ngem anusan kinanumona, karruba!

[wwwmangantayonkarruba.blogspot.com]

Lauya a Baka

 

Kaldo dagiti pada a nagpuyat.

Wen umaykayon ta agiguptay' man iti digo

ti lauya a [puro] karnet' baka a sinagpawak

iti bulong ti pechay ken chinese cabbage

ken adda bassit nagerret a patatasna.

Kaldo latta man bareng mabugtak ti samuyeng.

[wwwmangantayonkarruba.blogspot.com]

Pinakbet a bungat' sili ken nagisar a delata a baka

 

Pinakbet a puro bungat' sili nga adda laokna

bassit a bulong ti saluyot a naipareha iti

delata a baka [corned beef] a nagisar iti

sangkatedted a manteka ti baboy nga inasmangak pay

iti bulong ti pechay ti ikammet iti innapuy.

Mayat a kombinasion. Paganusanen a sida, piman.

'Maykan pada a nangisit ti sikona ta pagraramanan

ti adda. Karruba!

[wwwmangantayonkarruba.blogspot.com]