Lames-taaw/karayan ti sida

Lames-taaw/karayan mammet.

Ti sida. Manso, tira!

Paganusan, a.

Kas koma ti daytoy prito a tilapia a napulagidan iti lakaylakay [naglaok ti natadtad a bungat' sili ken bukel ti bawang], nawarakiwakan bassit iti naiwa a bulong ti lasona a pangar-artiokna ken iti bulong ti saba ti nagbalin nga ungot a paggammatan-panganan.

Mabsog la ketdi ti boksit. Saan a pakawanen ti ngiwat no alisto ti ima nga aggammat.

Ay, ikiras! Anusan ti gasangna.

Dikan baybayagen. 'Maykan, karruba!

[wwwmangantayonkarruba.blogspot.com]

 

Sinigang a Bangus

Umaykayon ta mangantayo, karruba. Pelpelantayo ti agkirkiraos a tian

iti sinigang a bangus a nalaokan ti pasayang, green pepper, bagas

ti aba ken sangkaiwa a bulong ti lasona.

'Maykan ta anusan ti nanumo a sida, karruba!

[wwwmangantayonkarruba.blogspot.com]

Pinakbet latta

 

Ket wen, paganusan manen, a, ti nanumo a sida; pinakbet laeng a bulong ti bawang a nakilinnudonan ti bassit a bungat' patani ken chicharon baboy.

Umanayen nga ibussog ti mamirmiraot a tian. No nangisit ti sikom, 'maykan ta manganta, karruba!

.

.

.

[wwwmangantayonkarruba.blogspot.com]

Adobo a Bagis ti Baboy

Isublat mammet ti agsida iti nalanit. Sagpaminsan. Uray ita lang manen.

Andingayentay’ man ketdi ti adobo a puro bagis ti baboy. Nangato ti uric acid level-na ngem iti daytoy a gundaway, ikidem. No agut-ot ti palaypalay ken nagsusuopan, itured ti sakitna. Ngem imasen. Imasen, piman.

 

‘Maykan, a, ta mangantan, karruba!

[wwwmangantayonkarruba.blogspot.com]

 

Kardis

sabong, sabong

agawaam agsabong

tapno adda purosen

a bungat’ paraburmo.

.

.

.

.

kardis

hardin ti wailuku

mar. 21 peb. 2o23

[wwwmangantayonkarruba.blogspot.com]

 

Marunggay [Marunggi]

ala, sika man. no dadduma,

iwalindakat' kaaduan

iti pagguummongan-punsionan

ngem ti bagi sikat' pakataraonan--

pagbiagan mamirmiraut a kas kaniak

wen, agsampagaka latta

iti hardinko agingga a siak ti mauma...

.

.

.

ita nga aldaw

marunggay[marunggi]

mar. 21 peb. 2o23

wailuku

[wwwmangantayonkarruba.blogspot.com]

 

Dinengdeng for life!

Nateng manen. Ala wen.

Agiguptay’ man ketdi iti digo ti marunggay, bungat’ tarong, susop ti saba a naparabawan iti prito a tilapia. Ania ketdin aya ti imasna ti maragatas a digona, piman. Arub-obekon, ne.

‘Maykayon, karruba!

[wwwmangantayonkarruba.blogspot.com]

 

Seafoods ken nateng man

 

Daytoy man ti sida ita nga aldaw: prito a tilapia nga adda laokna a bungat' tarong, okra [saluyot-kayo], rangaw ti kamotig ken bulong ti lasona. Seafoods ken nateng man.

Ken wen, 'maykayon ta mangantayon ne!

[wwwmangantayonkarruba.blogspot.com]

Es Kabetse manen

ES Kabetse [Kabeche] a Galunggong. Bukod a presentasion ti luto. Estilo ni Ilokano.

'Maykan ta ramanam, karruba!

[wwwmangantayonkarruba.blogspot.com]

#ilokanofood

#taraon

#eskabeche

#galunggong

#sida

 

Lauya a Baka

 

Agiguptay’ man ketdi iti nasabor a digo ti (na)lauya a tultulang ti baka a nasagpawan iti bulong ti petsay (pechay), patatas, sabong ti katuday, utong ken bungat’ tabungaw.

Sagpaminsan met nga agluto ti kastoy no adda mairana a maluto, piman, ta imbag la a pangdengngep ti bara ti digo iti agpigpigerger a laslasag no kastoy a nalamiis ti tiempo.

Ala wen.

[wwwmangantayonkarruba.blogspot.com]

#ilokanofood

#taraon

#lauya

#tulang

#baka

#bulong

#petsay

#patatas

#sabong

#katuday

#utong

#bunga

#tabungaw

#sida

Es Kabet-se[ng], este, s Kabeche[ng] Galunggong gayam

Gapu ta inyuso ni kompad ti balikas a kabet, sagutanka man iti bukodko a bersion a luto nga inawagak iti "es kabet-se[ng] galunggong," este, ES KABECHE[NG] GALUNGGONG [Fried Layang Scad] gayam. Hehe!

Simple lang dagiti naisagana a laok ken panemplana: adda kamatis, bungat' tarong ken kardis, adda pay uggot ti ilay-sanglay [alugbati]; sangkatedted a suyo, maysa kutsara a ginisa mix wenno chicken boullion. Ngem segun ti 'like' ti kayat a templa.

Ala 'maykan ta ramanan man ti kabetsek, karruba!

[wwwmangantayonkarruba.blogspot.com]

 

KBL ken L mammet, ne.

KBL ken L [Kamatis, Bugguong, Lasona ken Laya]

lattan ti iparehak iti prito a tilapia napia la

a pangimas ti pangan, piman.

'Maykan, karruba!

[mangantayonkarruba.blogspot.com]

 

Sabong mammet ti isublat a sidaen

Daytoy man lang [na]salad a sabong ti katuday ti pagipapasan nga ipareha iti innapuy, piman. Mapausanak man nga agsida. Ken masayanganak ta maregreg metten dagiti sabongna isu nga inalistoak ti nagpuros itay bigat.

.

Ay, napia pay ta adda latta nakasagana a purosen a lutoen manipud iti hardin a taraon ti bagi.

.

Ala wen.

[wwwmangantayonkarruba.blogspot.com]