Bukod a bersion wenno homemade version ti Relieno[ng] a Bangus. Pinadasko lang, piman, ta no dadduma, diak kursunada ti templa dagiti magatang a kastoy iti store. Pinadasko met, a, ti bukod a bersion daytoy a klase ti luto. Linaokak iti kamatis, sibuyas, laya, lima kutsara a suyo, asin ken bassit a vetsin. Binungonko iti aluminum foil. Intunok nga immuna kalpasanna, impalinayko iti steamer tapno maluto a nasayaat. Ket ne, nagimas man!

Relieno[ng] a Bangus

Pakbet nga uplak [diak ammo no kayo ti pangawagan ti dadduma daytoy] ti aba ti nagammatak a linuto a masida ita nga aldaw, piman. Wenno, maawagan kad' pay a "laing nga aba?" Hmm...diak ammo. Basta linutok lattan. Makaammod'tan no 'nia ti awagna. Linaokak bassit iti aramang, bawang ken bungat' sili. Mailiwak man nga agsida ti kastoy ta uray kasano ti kinanumona, adut' maibulonna nga innapuy ta nasustansia a taraon. Anusan, a.

Pakbet wenno laing nga uplak ti aba

Natuno/Insarabasab a ngiwngiw wenno subsob ken lapayag ti baboy. Natempla iti bassit nga asin, suka ken kalamansi, vetsin, sibuyas ken nawarakiwakan iti bulong ti lasona. Anusanen, a, ti kinanumo ti masida, piman...

Natuno/Insarabasab 

Nalingta a Freshwater Whole Smelt

Freshwater Whole Smelt

Salad a susop ti saba ken sabong ti katuday a natempla iti bugguong, kamatis, bassit a vetsin ken laya. Umanayen nga ibulon ti innapuy, piman.

Salad a susop ti saba ken sabong ti katuday

Bugguong, maigisar wenno ipalkang a/ti tukmem [clams], agpapada a naimas. Masansan ketdi nga ibugguongko ti tukmem ta sabali la ngamin ti imasna no madiguan wenno maigisar. Ngem apounayen, aya, no tukmem kunam, uray ania ti pannakaisaganana, naimasto latta.

Bugguong a tukmem

Isnabem man pay la 'ta beer. Maymayat daytoy nga inumen nangruna ket lumamiisen ti tiempo. Uray 'ta Crown Royal wenno Black Label, indian man. Makauma met. Padasen man met ti Tanqueray dry gin wenno ti Early Times whisky. Mayat daytoy para kadagiti di mapmapnek nga uminum. Padasenyo daytoy ta kitaek man no mausawankay' pay. Ti makiinum, agitugot ti pulotan. Hekhek!

Tanqueray and Early Times

Pinagkamborko a nilingta ti lames ti pampano ken tilapia. Mayat! Abusta nananam la ngaruden ti tilapia, dinegdegan pay ti pampano. Nagmayat a kombinasion, piman. Solve a talaga ti kaan. 'Maykayon ta maki-tomalkay' metten daytoy masida...

Nalingta a lames ti Pampano ken Tilapia

Ginisar a bungat' karabasa, okra ken paria a nalaokan bassit iti aramang ken nasagpawan iti chicharon baboy. Hmm...nasustansia a taraon. 'Maykayon, ne!

Ginisar a nateng

Naimas pay daytoy a pagpapigsa dagiti pada a managpuyat, lauya wenno nadiguan a puro karnet' baka. Puro a karne, awan tulangna. Dinekorasionak bassit iti nateng a Baguio Beans ken Hula Chow Fun Noodles. Naimas ngem liklikan koma dagiti pada nga adda gout-na ti agsida iti adu amangan no agatake ti sakit a mangitunda ti pagbabaywanyo a mangan. Narigaten, hekhek!

Lauya/Diniguan a karnet' baka

Daytoy ti nanumo a masida, naprito a layanglayang scad. Anusanen, a. Piman...

Fried Layanglayang Scad

Daytoy ti maysa kadagiti paggugustok a masida, dinengdeng a bungat utong, pallang, okra, bulong ti saluyot ken susop ti saba sa naparabawan iti naprito a galunggong [saan a makita iti ladawan].

Dinengdeng

Daytoy lattan, a, piman ti pamedped iti bisin, adobo nga uong. Nabaknang a taraon. Nasustansia iti protina. 'Maykayon ta pagraramanan ti adda.

Mushroom/Uong Adobo

Daytoy ti insaganak a pangaldaw, natorta a bungat' tarong. Nagimas ketdi man a parisan iti bugguong ken kamatis, wenno maisawsaw iti naperresan a kalamansi sa adda bassit bungat' sili. Gemasen! Ta uray kastoy la ti masida, adun ti maibulonna nga innapuy, piman. Ala umay ta mayat makikammet ngem anusan, a, ti nanumo a maidasar iti lamisaan...

Tortang Talong

Daytoy pay la ti pagmerienda, lumpiang shanghai, bayat a malutluto ti masida ita nga aldaw. Ala anusanen, a, ti adda. Ti makimerienda agbalon iti sopdrinks, wen?

Cooked Crispy Lumpia

Ket kas gagangay manen, piman, daytoy ti nagammatak a linuto, pork igado. Homemade lang ketdi, a, piman, ta maserbianna la ti tallo agingga iti uppat a tao ti linutok nga igado. Natempla iti bassit a suyo, cooking wine, ginisa mix, vetsin, gisantes, bukel/bulong ti paminta, subuyas ken carrots. Okey met ta naikiras, piman. Ket urayak la maapeluan iti balasitangko ta sumanapsap pay nga agisakmol, piman...

Homemade Pork Igado

No dadduma, yapalko man unay ti bagik a makasida iti kastoy, uray sagpaminsan, uray ammok nga agalekto manen ti palaypalayko. Ngem 'nia ngarud ti maris ti biag no di padasen, uray pay ti kuna ti doktor a maiparit nga ipauneg a taraon. Maminsantay' la nga agbiag ket uray kadi met, a, sagpaminsan la nga ibulon iti innapuy ti sida a Chicharon Bulaklak, piman. 'Maykayon ta danggayandakam' man a mangan ket naidasaren iti lamisaan...

Chicharon Bulaklak

Ket wen, a, ana pay ngarud di agsida iti pinakbet, piman. Anusan, anusan ta isu lat' mabalin nga isaang. 'Maykayon amangan no maibus, ne!

Pinakbet

Hus! Daytoy lattan, a, ti nanumo a pangaldaw datao, piman. Nateng met la ketdi, a. Wen, pinakbet. Imbag la ketdin ta adda pay nabati iti sinidami a pinangrabii ken ni Baket numuna ta masadutak nga agluto. Ngem perme ti panangustok iti daytoy a luto, piman. Luto ngamin ni Baket. Luto a pakbet ni Baket, hekhek!

Pinakbet

Kalpasan ti napigsa a bayakabak ti nagpatnag a tudo, kunak man no mangwakniten ti langit ta napintas ti rubbuat ti nainit a bigat, ngem biddut gayam. Nalulem pay la ti paniempo ket igandatna manen nga ibuyat ti tudo. Nupay kasta, mayat met ta libre ti pagsibog kadagiti mula. Ti la makadakes no makalawas a nabasa ti aglawlaw, piman. Gapuna a daytoy ti nagammatak a linuto. Kaalistoanen a maluto, piman. Wen, anusan, anusanen ti nanumo a sida iti lamisaan. Simple ngem nasustansia nangruna ti digona. Wen, anusan ti nadiguan a clams/tukmem ta napia la a mangdengngep ti pudotna ti agkirkiraos a tiyan. Napia la a pamigsa dagiti pada a nagpuyat...

Nadiguan a clams/tukmem

Ops, daytoy lattan piman ti pangaldaw, torta a bungat' tarong. Baliwan ti uso, mangiyuso ti baro. 'Maykayon, ne.

Torta a bungat' tarong

Daytoy ket daytoyto latta ti imasek nga igupen ti digona, nadiguan/lauya a karnet' baka a nasagpawan iti rabong. Simple a taraon ngem napintas unay a para kadagiti pada a nagpuyat, pagpapigsa ti tumeng/tuod. Ta uray no diak kayat koma ta kalkalpas a nagpambar ti palaypalayko, taoak lang a masulisog piman. No apay ketdi ngamin a naimas ti maiparit? Ngem ala, 'wanen mabalin ta naisaangen iti dalikan ken naluton. Ket bayat ti pannakkumikomko iti kusina nga agisagana manen para ti pangrabii, nakasaganan ti lamisaan a panganan. "Mangantayon, Karruba!" naipukkawko la ngarud. Hekhek!

Nadiguan/Lauya a karnet' baka a nagsapawan iti rabong

Daytoy lattan, a, ti ipauneg ita a pangaldaw, piman. Daytoy ti natukmaak ket isu lattan, a. Nabayag metten nga ar-arapaapek ti makasida iti natuno/insarabasab a karne/tabat' baboy ngem gapu ta nalaing unay nga agpambar ti sakak, sus, naisardeng daytoy a bisiok. Ngem mayat manen. Banatak manen ta nalaingen. Ngem no agsakit, ikidemkonto ti ut-otna, piman. Ala, 'maykay' ketdin ta danggayandak man na mangaldaw.

Natuno/Insarabasab a karne/taba ti baboy

Daytoy man ti pangaldaw datao piman, adobo a kurita: ilocano style. Wen, indian man pay laeng ti agsida iti karne, uray ania a klase ti karne ta bareng makaungar 'toy palaypalay nga inatake ti bukod a partuat a masida. Nasukir tay met ngamin no maminsan. Ta uray maiparit, ala manso. Ipauneg latta. Ngem kasano ket naimas ti maiparit, di ngamin? Homemade style a luto daytoy adobo ta naluto iti sangkabassit a suyo, cooking wine, adobo mix, ginisa mix, bulong ken bukel ti paminta, bawang ken naigilapan iti bassit a sibuyas. Medyo anemic ti langana ngem anusanen, a, ta napia la pamedped iti bisin imbes nga agsaraaw ken agkurudokod ti boksit. Ne, 'maykayon ta banatantayon!

Adobo a kurita

Spicy and aphrodiciacs. Natuno a bungat' sili ken okra, naimas a kombinasion a sidaen ita ta agtudtudo ditoy batogko a langit piman. Pagpapudot ti piditpidit ti lapayag. Ken mayat ta okra sakbay ti labing-labing, sigurado la ket ngarud a perme ti panagparuar ti kua...ling-et. 'Maykayo ketdin ta danggayandak a mangan ta di man sabali ti agrehistro dita panunotyo, hekhek!

Natuno a bungat' sili ken okra

Sabali manen a bansada ti bunga ti ling-et: Dragon Fruit

Dragon Fruit

Nupay naladawen a pangrabii, ikamakam ti bisin piman. Nanumo a pangrabii ta tinolang manok. Awan ti adu a laokna malaksid laeng ti bassit a piraso ti nagilap a bungat' papaya. Imasen piman napia la a pamigsa...

Tinola a Manok

Kumaldo/Agiguptay' man iti sigang/paksiw a bangus ita ta medyo aglulemlulem ti panawen. Pagpapigsa pay, piman, nangruna kadagiti padak a mangrabrabii nga agtrabaho. Agas ti bannog. Agas ti puyat. Umaykayon ta danggayandak man a mangaldaw, Karruba!

Sigang/Paksiw a Bangus

Daytoy man pay ti sidaek ita nga aldaw, agigup ti digo ken agus-us iti bungat' marunggay/marunggi. Pagpapigsa. Pammaregta iti salun-at saan laeng iti bagi no di pay iti panunot. 'Maykayon, karruba!

Bungat' Marunggay/Marunggi

Chocolate meat, kuna ti dadduma. Ngem ad-adda a dinardaraan kuna met dagiti nangisit ti sikona. Daytoy man ti nagammatak a linuto a pangaldaw piman, dinardaraan a karne/tabat' baboy. Puro ta awan man la nateng a laokna, piman. Ala, an-anusanen, a, napia a pamedped ti bisin. 'Maykayon ta pagraramanan, karruba!

Dinaradaraan a karne/tabat' baboy

Sidaen nga ikammet iti innapuy, mayat latta. Wenno ipareha iti beer mayat latta met ti blue swimming crab with claw a pupus wenno pulotan. Daytoy ti naimas ken maibagay a ngalngalen wenno pulotanen dagiti pada a ngannganin saanen a makagalgal iti natangken a masida. Nalukneng, presko. Sepsepen, karemkemen- mayat latta! Saanen a nasken nga ilamaw wenno iluto basta adda nakasagana a pangtempla kas iti kim chee base, lakaylakay, bassit a natadtad a laya ken sangkatedted a suyo. Swak, napankan!

Blue Swimming Crab

No maminsan, kaykayatko a mabugguong ti tukmem/bennek ngem ti madiguan wenno mapalkang. Adu ngamin ti maibulonna nga innapuy no mabugguong aglalo no saan a pangapgaden ti templana. Naimas met no matadtadan bassit ti laya sa maperresan iti kalamansi ken maparabawan ti lakaylakay [natadtad a bukel ti sili ken bawang]. Nagimasen, bebe! Perme la ketdi ti panagaruyot ti ling-et ken katay no kasta a maibulon iti innapuy. Uray daytoy ti sidaek, mayaten. Whew!

Bugguong a tukmen/bennek

Daytoy ti kursunadak a linuto; pakbet a bulong ti saluyot a nalokan iti bassit a bungat' utong, kuros kubbo ken uong. Magustoak man ti panaggalisgalisna iti ngiwat ken ti templado nga apgad ken alsemna. Diak la ketdi palabsen daytoy, piman. 'Maykayon!

Pakbet a bulong ti saluyot a nalaokan iti bungat' utong, kuros kubbo ken uong

Daytoy man ti il-iliwek a pangaldaw ita: pakbet a bungat' sili, okra ken paria a naparabawan iti sangkabassit a chicharon baboy. Anusanen, a, ana pay ngarud, piman. 'Maykayon ta danggayandak man, ne.

Pakbet a bungat' sili, okra ken paria

Daytoy man ti sidaek ita, naprito a tilapia ken naparabawan iti naigisar a bungat' utong, paria ken sili. Ala, paganusanen, a, piman...

Prito a Tilapia

Hus, daytoy pay la ti pagpapasan a sidaen piman: Batso a bungat' karabasa ken utong a naigisaran iti sangkabassit a karne ken taba ti baboy a nalaokan iti dried mushrooms, sibuyas, bawang ken aramang. Natempla iti bassit a suyo, cooking wine, ginisa mix, garlic salt ken bassit a vetsin. Anusan, a, piman ta napia la a pamedped iti bisin nangruna kadatao a mangrabrabii nga agtrabaho.

Batso a bungat' Karabasa ken Utong

Ket uray agsakiten, a, ti saka basta maramanak daytoy Sweet and Sour Crab Legs. Baam man pay la ta gout. Baam ta ibturan ti sakit ti palaypalay ken gurong uray ket adda agasna. Ti nasken ita, ramanantay' met, a, ti naimas a potahe sagpaminsan uray no narigat ti agsapul ti doliar a pagbiagan. Ikidem ti presiona basta makaraman, piman. Sagpaminsan laeng, piman. Sagpaminsan... Naigisar ti crab iti bassit a manteka, nangbatil iti dua nga itlog, banana catsup [spicy], calamansi juice ken bassit nga asukar. Naikkan met bassit iti green seaweed a pannakadekorasionna metten. Ala ramananyo man no mayat met laeng...

Sweet and Sour Crab Legs