Inasmangak man ti dinengdeng iti ginataan nga aba. Linaokak bassit iti naigisar a karne ken taba ti baboy ken nasagpawan ti daing. Mayat a kombinasion ta mabalanse ti karne/taba iti nateng. Ket ana pay ngarud no di anusan ti masida, piman.

Ginataan nga Aba

Batso a bungat' tabungaw ti nagammatak a naluto iti daytoy nga aldaw. Naigisaran bassit iti taba/karne ti baboy ken nasagpawan ti daing. Hmm...anusan, piman.

Batso a Bungat' Tabungaw

Hus! Daytoy ti kaalistuan a nalutok, piman; pakbet a [puro] bulong [ken bassit a bagas/bukel] ti bawang. Nasagpawan ti aramang ken naigisaran iti sangkabassit a taba ken karne ti baboy. Wen, a, anusan ti kinanumo ti masida, piman...

Pakbet a bulong ti bawang

Batso a bungat' tabungaw a naigisaran iti karne/taba ti baboy a nalaokan iti tallo piraso a shrimps ken nawarakiwakan iti bassit a natadtad a bulong ti lasona ti napili a taraon ita a natutudo ditoy batog a langit. Nanumo ngem anusan...

Batso a bungat' tabungaw

Hus! Daytoy lattan, a, ti nanumo a pangaldaw datao, piman. Nateng met la ketdi, a. Wen, pinakbet. Imbag la ketdin ta adda pay nabati iti sinidami a pinangrabii ken ni Baket numuna ta masadutak nga agluto. Ngem perme ti panangustok iti daytoy a luto, piman. Luto ngamin ni Baket. Luto a pakbet ni Baket, hekhek!

Pinakbet

Daytoy lattan, a, ti ipauneg ita a pangaldaw, piman. Daytoy ti natukmaak ket isu lattan, a. Nabayag metten nga ar-arapaapek ti makasida iti natuno/insarabasab a karne/tabat' baboy ngem gapu ta nalaing unay nga agpambar ti sakak, sus, naisardeng daytoy a bisiok. Ngem mayat manen. Banatak manen ta nalaingen. Ngem no agsakit, ikidemkonto ti ut-otna, piman. Ala, 'maykay' ketdin ta danggayandak man na mangaldaw.

Natuno/Insarabasab a karne/taba ti baboy

Chocolate meat, kuna ti dadduma. Ngem ad-adda a dinardaraan kuna met dagiti nangisit ti sikona. Daytoy man ti nagammatak a linuto a pangaldaw piman, dinardaraan a karne/tabat' baboy. Puro ta awan man la nateng a laokna, piman. Ala, an-anusanen, a, napia a pamedped ti bisin. 'Maykayon ta pagraramanan, karruba!

Dinaradaraan a karne/tabat' baboy

Hus, daytoy pay la ti pagpapasan a sidaen piman: Batso a bungat' karabasa ken utong a naigisaran iti sangkabassit a karne ken taba ti baboy a nalaokan iti dried mushrooms, sibuyas, bawang ken aramang. Natempla iti bassit a suyo, cooking wine, ginisa mix, garlic salt ken bassit a vetsin. Anusan, a, piman ta napia la a pamedped iti bisin nangruna kadatao a mangrabrabii nga agtrabaho.

Batso a bungat' Karabasa ken Utong

Daytoy ti napilik a potahe a linuto ita nga aldaw: Batso a bungat' karabasa, paria ken tarong a nalaokan bassit iti karne ken taba ti baboy sako pinarabawan iti dried mushrooms ken aramang. Ket wen, a, ana ngarud pay no di pagraramanan ti adda. 'Maykayon ta ikirastayo, ne!

Batso a bungat' karabasa, paria ken tarong

Uray ang-angalek pay la ti gout-ko, mapawilandak ngarud nga agsida iti insarabasab/natuno a taba/karnet' baboy? No apay ketdi ngamin naimas ti maiparit? Ngem agingga nga adda agas para iti daytoy, mangantayo ketdi ta saan met a kankanayon ti agsida iti kastoy. 'Maykayon, la!

Natuno/Insarabasab a karne/tabat' baboy

Natuno a karne ken taba ti baboy. Natempla iti bassit nga asin, vetsin ken sukang iloco, ken nawarakiwakan iti bulong ti lasona...

Natuno a karne/taba ti baboy

Daytoy lattan ti nanumo a pangaldaw, piman: Bungat' utong a naigisar bassit iti taba ken karne ti baboy, nakamatisan, nasibuyasan, natempla iti sangkatedted a suyo, cooking wine, ginisa mix ken nawarakiwakan iti bungat' paminta. 'Maykayon ta paganusan ti kinanumo!

Naigisar a bungat' utong