Natuno a Sabong ti Katuday

Baliwak mammet ti uso ta saan a daytay nakaruaman

a kamatis ken bugguong ti pagtempla iti natuno

a sabong ti katuday no di ket Kim Chee Base 

ken Tabasco. Ngem gapu ta diak mapnek iti gasangna,

ninayonak pay iti lakaylakay [natadtad a bunga

ti silit' sairo ken bukel ti bawang]. Ket ne, whew!

Gemasen.

'Maykayon ta ramananyo ti nanumo a sida, piman.

[wwwmangantayonkarruba.blogspot.com]

 

Batso manen

Ala wen, daytoy man ti isublat a sida: batso [bacho] a bungat' karabasa, paria, kardis, patani, tarong ken beans [berde]

a naigisaran bassit iti taba ken lasag ti baboy ken nasagpawan ti aramang.

'Maykayon ta pagraramanan ti nanumo a sida, karruba!

[wwwmangantayonkarruba.blogspot.com]

 

Nateng for life. Manso, tira latta, karruba!

Sangadakulapan a sabong ti katuday ken rangaw

ti kamotig, adda pay bunga ti kabatiti ken 

uong, makaanayen a sida ti dua a tao, piman.

Wen man, inabrawko. Nagimas man nga igupen ti digona

aglalo ket adda pay sagpawna a pasayang.

'Maykayon ta mangantayon, karruba!

[wwwmangantayonkarruba.blogspot.com]

 

Dagiti Ala a Ladawan iti Hardin Ita nga Aldaw

Pinadalanak met dagiti mula a taraon ti bagi

iti hardin itay bigat, adda met napurosko a sabong 

ti katuday napia la a paglaok iti maluto a sida. 

Uray ti mula a pias, adu metten ti bungana. 

Adda pangalsem iti sida. Narukbos met ti kamotig

ken natayagen ti maysa pay a mula a kalamansi. 

Mayat, tira. Pagyamanan dagitoy a paraburyo.

Dikay' maum-uma.

[wwwmangantayonkarruba.blogspot.com]

 

Pakpako

Maysa kadagiti paboritok a pangdarasan a luto

nangruna no agmaymaysa datao a mangsango ti lamisaan

isu daytoy nagisar iti apagtedted a manteka a rangaw

ti pakpako a nalaokan iti lakaylakay [natadtad a bungat'

sili ken bukel ti bawang]. Nagimas man. Itured la

ti gasangna ngem makaanayen nga ibulon iti innapuy.

'Maykayon ta mangantayon, karruba!

[wwwmangantayonkarruba.blogspot.com]

Nalingta a Tilapia

 

Isublat mammet ti nalingta a tilapia a sida nga inap-apak ken sinagpawak iti rangaw ti kamotig.

Ageksperimentotayo latta nga agluto, no aniat’ mabalin a maluto ken lutuen. Awan patingga a sursuroen dagiti banag a ditay' pay napadasan. Gapu kadayta, saanen a nasken nga agsapul iti naimas a sida. Ti nasken, adda taraon ken pamigsa ti bagi nga agpuyat nga agtrabaho.

‘Maykayon ken mangantayon, Karruba!

.

(wwwmangantayonkarruba.blogspot.com)

Batso ti isublat a sida

Batso [Bacho] a bungat' karabasa, sili ken tarong

a nalaokan iti nagisar a taba ken lasag ti baboy

ti ipareha iti innapuy ita.

Ala manso. Tira! Anusan ti masida, karruba!

[wwwmangantayonkarruba.blogspot.com]

Prito a Tilapia a naparabawan iti nagisar a nateng

Prito a tilapia a naparabawan iti nagisar 

a bungat' utong, okra [saluyot-kayo],

paria, patani ken marunggay. Daytoy ti nanumo

a sida napia la a pangay-ayo iti boksit 

nga agrungrungaab ita, piman. Ala wen,

anusan ti piman a sida dagiti pada a nangisit

ti sikona.

'Maykayon ta mangantayon, karruba!

[wwwmangantayonkarruba.blogspot.com]

Nilingta a Mataan

Daytoy man ketdi nilingta a lames ti mataan [akule] ti ipelpel iti boksit bareng agsardeng nga agrungrungaab numuna ket disintonado pay, hehehe!

‘Maykan, karruba!

[wwwmangantayonkarruba.blogspot.com]

Nagkakambor, piman.

Daytoy la ti nanumo a sida ita, piman.

Wen, uray kastoy ti kasimple ti masida,

mabsogakon. Nagisar iti sangkabassit a manteka

ti baboy ti uong, tufo ken shrimps. Natempla

iti suyo, ginisa mix, cooking wine ken corn starch

ken adda burluloyna a bulong ti lasona.

'Nia pay sapulem, karruba? 'Maykan, ne!

[wwwmangantayonkarruba.blogspot.com]

Nateng manen, piman.

Nateng manen, piman.

Wen, agiguptay' man ketdi iti digo ti uggot

ti karabasa ken bulong ti marunggay napia la

a pamigsa ken mangdengngep ti napuyatan a tian 

dagiti pada a mangrabrabii nga agtrabaho.

 

Anusan manen, karruba.

[wwwmangantayonkarruba.blogspot.com]

Pinakbet a bungat' sili

Pinakbet a [puro] bungat' sili a nalaokan

sangkabassit iti bulong ti saluyot. Umanayen

nga ibulon iti innapuy a pamedped ti bisin.

'Maykayon, karruba!

[wwwmangantayonkarruba.blogspot.com]

Nateng manen...

Nateng manen, nateng latta.

Agiguptay’ man ketdi iti digo ti inabraw— bungat’ tarong, patani, utong, okra (saluyot-kayo), sabong ti katuday ken adda pay sagpawna nga uong napia la a pamigsa nga agitured iti lamiis dagiti pada a mangrabrabii nga agsapul iti pagbiag, piman.

Manso! Ibusen, arub-oben ti kinasustansia ti masida. Dikan baybayagen, ‘maykan, karruba!

[wwwmangantayonkarruba.blogspot.com]