Prito a tilapia ken nateng latta

Daytoy ti nagsangnguanmi a sinida ken ni baket,

prito a tilapia a linaokak ti bungat' paria, 

sili ken utong a nagisar iti bassit a manteka

napia la nga adda dekorasion ti taraon.

Makaanayen a mangpaulimek iti agik-ikkis a tian,

piman. Ala wen, umaykayon karruba!

[wwwmangantayonkarruba.blogspot.com]

 

Kilawen a Kalding

Pinadawatandak iti kilawen a kalding. Diak impareha

ti serbesa. Inlabayko ketdi iti innapuy. Makaanayen

a pamedped ti bisin, piman.

[wwwmangantayonkarruba.blogspot.com]

 

Dinengdeng latta. Manso!

Uhu! Daytoy la ti nanumo a sida ita a pangaldaw: 

bulong ti marunggay, sabong ti katuday ken adda

sangkabassit sagpawna nga uong ken okra.

Anusan ti dinengdeng nga ikammet iti innapuy 

a kasango ti padak a naulila a lamisaan 

iti innak panagmaymaysa manen, piman.

Iyayabko lattan no sino ti mayat a makisango

a mangan kaniak, karruba!

[wwwmangantayonkarruba.blogspot.com]

 

Nilingta a Dumadara

Indian man pay laeng ti agsida iti karne. Makauma ken makasuya met. Ken saanak a "Triple A" [agbibisin, agpapaus ken agraraman] kadagita a banag. Daytoy man pay la lames ti pagpapasan, piman.

Wen, makaanayen daytoy a pamedped iti bisin: nilingta a lames ti dumadara. Adu't maibulonna nga innapuy. Uray saankan a makipunsion, mabsogkan ta malaksid a naimas, nasustansia pay. Pinarabawak bassit iti burluloyna a bungat' sili.

Anusan ti nanumo a sida. 'Maykan, karruba!

[wwwmangantayonkarruba.blogspot.com]

 

Sinigang a bangus...

 

Daytoy ti nanumo a sida ita nga aldaw dagiti amma, Sinigang [Paksiw]

a Bangus a nasagpawan iti bungat' okra ken bulong ti lasona. Agiguptay'

mammet ti digo napia la a kired dagiti tulang, susuop ken lasag a nagpuyat manen para ti pagbiagan, piman.

Nanumo. 'Maykan ta makiigupka met, karruba!

[wwwmangantayonkarruba.blogspot.com]

Salad a pakpako

Daytoy ti nanumo a sida, [na]salad a rangaw

ti pakpako. Anusan manen, piman.

'Maykan ta manganta, karruba!

[wwwmangantayonkarruba.blogspot]

 

Adobo nga uong

Daytoy man ti isublat a sida, adobo [namarinada]

nga uong [mushrooms] a nalaokan bassit iti susop

ti saba. Ay napia la a pangpelpel iti agrungrungaaben

a tian, piman. Anusan, a. Piman a kinapiman...

Bukodakon dika umap-apal, karruba.

[wwwmangantayonkarruba.blogspot.com]

Isublat ti pasayang

Kalpasan ti agbilbilaw a tirem [oyster] a sinida

itay kallabes nga aldaw, daytoy met nagkukot a pasayang

ti isublat nga ikiras, piman. Naigisar la bassit iti butter

a mangpananam ken mangparaman. Mayaten. Awan adu a panempla

a nailaok. Indian man pay laeng ti agsida iti karne 

ta makasuya met. Padasen ti puro seafoods 

ken nateng iti ipauneg. Ala, a.

'Maykayon ta pagraramanan, karruba!

[wwwmangantayonkarruba.blogspot.com]

 

Abal-abal mammet

Hu! Imbag man ta awan nangsalangad kadaytoy paw-it ni kabagis nga agarup kagudua ti medium size ziploc ti kaaduna nga abal-abal iti eropuerto a nagrubbuatanna iti Filipins, piman. Saan a kas kadaydi immuna a paw-it a saan a pulos dimmanon iti destinasionna. Ngem ala, daytoy ti sida a pagpapasan ita. Ginisarko iti bassit a manteka. Mayaten! Makaanayen daytoy nga ikammet iti innapuy. Pagyamanan ta makaraman manen datao iti abal-abal.

'Maykayon ta pagraramanan ti sangkabassit nga adda a sida, karruba!

[wwwmangantayonkarruba.blogspot.com]

Daytoy ti kaimasan a sagut a taraon ti Dios iti lalaki

Oyster [Tirem]

No masuyakan nga agsida iti karne wenno lames,

daytoy man ti maysa a kaimasan a masida

wenno pulotan nga ipareha iti serbesa--

tirem, aglalo no maidumudom iti naperresan

a kalamansi nga adda laokna a bungat' sili

ti sairo. Ala, padasem man.

'Maykayon, karruba!

[wwwmangantayonkarruba.blogspot.com]

 

Bugguong a tukmem

No maminsan, kaykayatko a mabugguong ti tukmem/bennek ngem ti madiguan wenno mapalkang. Adu ngamin ti maibulonna nga innapuy no mabugguong aglalo no saan a pangapgaden ti templana. Naimas met no matadtadan bassit ti laya sa maperresan iti kalamansi ken maparabawan ti lakaylakay [natadtad a bukel ti bawang ken bunga ti sili].

Nagimasen, bebe! Perme la ketdi ti panagaruyot ti ling-et ken katay no kasta a maibulon iti innapuy. Uray daytoy la ti sidaek, mayaten. Whew!

'Maykan, karruba!

[wwwmangantayonkarruba.blogspot.com]