Hu, daytoy lattan ti anusan nga ibulon iti innapuy: [pork] homemade meat balls ken maisawsaw a kayo ken bulong ti pechay ti naperresan a kalamansi iti bugguong. Anusan, a, piman, anusan...piman

[Pork] Homemade Meat Balls

Bulong ken kayo ti pechay

Daytoy ti pangaldawmi ken ni Baket, bukod a bersion a luto ti Pork Igado, piman. Anusanen, a, ta isu met ti natiliwko dita ref a linuto...

Pork Igado

Uray ang-angalek pay la ti gout-ko, mapawilandak ngarud nga agsida iti insarabasab/natuno a taba/karnet' baboy? No apay ketdi ngamin naimas ti maiparit? Ngem agingga nga adda agas para iti daytoy, mangantayo ketdi ta saan met a kankanayon ti agsida iti kastoy. 'Maykayon, la!

Natuno/Insarabasab a karne/tabat' baboy

Sinigang/paksiw a lames a Pampano ti pangaldaw, piman. Awan met ketdi, a. Kayatko lang ta mailiwak man nga agigup iti digo. Narigat metten no puro karne ti sida. Linaokak man iti bungat' sili, okra ken bulong ti lasona. Anusanen, a, piman...

Sinigang/Paksiw a Pampano

Pancit for life. Daytoy lattan piman ti pangaldawko. Masadutak nga agluto. Linaokak bassit iti karnet' manok, [bell] pepper, repolio ken nawarakiwakan iti bulong ti lasona...

Pancit Canton

Daytoy man ti taraonmi ken ni Baket ita, ginisar a bungat' utong, karabasa ken okra. Naluto iti bassit a mantenka, bawang, ginisa mix ken suyo. Pinatedtedak iti sangkakutsarita a bugguong. Naparabawan iti home-made cooked chicharon baboy. Simple a luto para iti dua a tao. Umaykayon, Karruba, ta mangantayon!

Ginisar a bungat' utong, karabasa ken okra.

Hu, baam no sumro ta gout. Maiparitmo ngarud a sidaen no isut' naimas? Kas koma iti daytoy adobo a bagis ti baboy, naimas. Naramas iti suka ken asin. Nabuggoan. Natempla iti bassit a soyo, cooking wine, pinatedtedak iti bugguong, naikkan iti bukel ti bawang ken pamienta. Naluto. Nagmanteka bassit, ayus! Kalpasanna, pinarabawak iti pepper. Mayaten, Kaka! Saan la a dayta, pinarisak pay iti bugguong a padas a pangontra iti lanit...

Adobo a bagis ti baboy

Bugguong a Padas

Natuno a karne ken taba ti baboy. Natempla iti bassit nga asin, vetsin ken sukang iloco, ken nawarakiwakan iti bulong ti lasona...

Natuno a karne/taba ti baboy

Daytoy lattan ti nanumo a pangaldaw, piman: Bungat' utong a naigisar bassit iti taba ken karne ti baboy, nakamatisan, nasibuyasan, natempla iti sangkatedted a suyo, cooking wine, ginisa mix ken nawarakiwakan iti bungat' paminta. 'Maykayon ta paganusan ti kinanumo!

Naigisar a bungat' utong

Gapu ta daytoy ngatan ti kaalistuan a lutuek a pangaldaw, ket wen, daytoy lattan, a. Pakbet a bulong ti saluyot, bungat' sili, bungat' aba a nasagpawan iti prito a bangus. Ket wen, anusanen, a, ti kinanumo ti masida, piman....

Pakbet a bulong ti saluyot ken bungat' sili

Hus! Daytoy latta manen, a, piman ti pangaldaw: adobo a pusit a nalaokan iti karne ken taba ti baboy, naparabawan bassit iti bungat' sili. Natempla iti bassit a suyo, ginisa mix ken cooking wine. Anusan, a. 'Maykayon ta dikay' mabisinan!

Adobo a pusit

Adobo a Pupus. Wen, daytoy latta manen a piman ti sidaen datao, adobo a subsob ken lapayag ti baboy. Natempla iti suyo, cooking wine, adobo mix, ginisa mix, sukang iloco, vetsin ken asin. Naigilapan bassit iti sibuyas ken natadtadan bassit iti laya.

Adobo a subsob ken lapayag ti baboy

Nanumo. Wen, nanumo a pangaldaw lattan piman. Nupay kasta, imasen, a, daytoy taho a naigisar iti bassit a manteka, bawang, sibuyas ken nalaokan iti bulong ti pechay ken shrimps. Natempla iti suyo, vetsin, ginisa mix ken cooking wine. Ket ana pay ngarud piman no di anusan. 'Maykayon, a!

Taho, bulong ti pechay ken shrimps.

Naimas nga ibulon iti innapuy daytoy pinakbet a bungat' paria. Uray adda bassit papaitna, mayat latta piman. Kastoy a talaga ti sida ti nangisit ti sikona...

Pinakbet a bungat' paria.

Uray kastoy la ti pangaldaw, mabsogakon. Naigisar iti sangkabassit a manteka nga uong, tufo ken shrimps. Nawarakiwakan iti bassit a bulong ti lasona, natempla iti suyo, ginisa mix, cooking wine ken corn starch...

Tufo, shrimps and mushrooms. Photo taken by IPhone 6 Plus and first posted in Photobucket.

Aysus, daytoy lattan ti pangaldaw piman. Kasla awan man gaganasak a mangan. Nupay kasta, adu met ti naibulonna nga innapuy daytoy nagbugguongan a padas a naperresan iti kalamansi, naigilapan iti kamatis, natadtadan bassit iti laya ken sibuyas. Ket ana pay, sinulok manen ti lamisaan piman...

Nabugguongan a padas. 

Hus! Daytoy lattan ti pangaldaw, piman. Nalaklaka la bassit a lutoen. Corned beef a naigisar iti bulong ti pechay, bassit a celery, sibuyas, bawang ken manteka...

Corned beef. Immuna a naiposte iti Photobucket.

Saankon a sapulen ti karne a sida no daytoy ti ibulonko iti innapuy. Umanayen daytoy a pamedped iti bisin. 'Maykayon, Karruba!

Pakbet a bungat' sili a nalaokan iti sangkabassit a bulong ti saluyot ken bawang; natempla iti bugguong, suka ken vetsin. Ladawan ala ti IPhone 6 Plus. 

Nagimas ketdin nga igupen daytoy kaldo. Pagpapigsa aglalo dagitay pada a nagpuyat, piman. Umaykayon ta ikirastayo daytoy kalluto a diniguan [lauya] a karnet' baka!

Diniguan [lauya] a karnet' baka a nalaokan iti bulong ti pechay. Ladawan ala ti IPhone 6 plus.

Umaykayon ta pagraramanan ti kalluto a tinolang manok. Agkaldotayo, kapudpudotanna pay!

Tinolang manok a nalaokan iti bungat' papaya ken nasagpawan iti bulong ti paria. Photo taken by IPhone 6 Plus.

Ne dagitay pada nga adda haybladna, mayat daytoy a sidaentayo. Natuno a puro karnet' baboy, awan tabana...

Natuno a karnet' baboy [puro, awan tabana], a naigilapan iti sangkabassit a sibuyas ken natempla iti sukang iloko, vetsin ken asin.

Pakbet a bungat' okra, utong, kardis ken paria, hmm...anian!

Bungat' okra, utong, kardis ken paria

No agbellad, saan met a napait ngem nagalis. Hekhek!

Batso a bungat' balatong a nasagpawan iti bulong ti paria ken bungat' okra

Prito a Bangus...

Prito a bangus

Adobo a manok...

Adobo a manok

Dinardaraan a Karnet' Baboy a nasagpawan iti bulong ti lasona

Ti bukodko a bersion a pannakaluto ti dinardaraan a karnet' baboy