Fried Pakpako with Chilli on Top

 

Maysa kadagiti paboritok a pangdarasan a luto ni Baket, ti nagisar nga uggot/rangaw ti pakpako a nalaokan iti lakaylakay [natadtad a bungat' sili ken bawang]. Inawagan ni Baket daytoy iti Fried Pakpako with Chilli on top.

'Maykan ta ramanam ken danggayannak a mangan, karruba!

[wwwmangantayonkarruba.blogspot.com]

Nanumo a sida

Nagisar iti bassit a taba ken lasag ti baboy a bungat' karabasa a nalaokan ti utong, okra ken paria. Umanayen a pangap-ap iti tian ken pamedped ti bisin kadatao a mangrabrabii nga agtrabaho.

'Maykayon ta pagraramanan ti nanumo a sida, karruba!

[wwwmangantayonkarruba.blogspot.com]

Salad manen a di kauma

Wen, salad a nateng mammet ti isublat nga ipelpel iti tian, piman. Berde a taraon latta ti pagpapasan. 

Kadagiti pada a nangisit ti sikona, ammoda no kasano ti kinanumo a sida daytoy salad a susop ti saba nga inasmangak iti okra [saluyot-kayo] ngem nasustansia ken nabaknang a taraon, ala.

'Maymo ramanan no kayatmo, karruba!

[wwwmangantayonkarruba.blogspot.com]

Nakapupok iti lata ti sida ita

Masadutak nga agsukain ti maluto iti pagpupokan isu a daytoy lattan ti napidutko a pangalistuan a linuto-- nagisar nga spam iti bassit

a manteka a nailudonludon iti kamatis ken sibuyas, nawarakiwakan ti sangkalilit a bulong ti lasona ken napatedtedan iti cooking wine a pagpabanglo.

Kasta siguro no nagpuyat ti tao, saanen a nasken nga agipauneg ti naimas a sida basta adda pangap-ap iti mabisinan a tian, piman.

Ala wen, la. 'Maykan ta ikirasta, karruba!

[wwwmangantayonkarruba.blogspot.com]

Bungat' paria ken kardis

Nanumo a sida ngem anusan, piman.

Wen, nagisar iti sangkabassit nga iwa ti lasag ken taba ti baboy. Kalpasan a nagmanteka, nailudon a nailaok ti bungat' paria ken kardis. Nakamatisan, naikkan sibuyas, napatedtedan ti suyo ken nadikdikan iti sitsaron baboy. Huston, umanayen a pangap-ap iti agik-ikkis ken nabisinan a tian a nagpuyat iti trabaho. Kasta a talaga...

'Maykan, karruba!

[wwwmangantayonkarruba.blogspot.com]

Liningta a Mataan

 

Daytoy ti nanumo a sida a kasangok iti lamisaan ita: liningta a mataan [akule]. Isu met ngamin ti nakammelko iti nalamiis a pagpupokan. Anusan ta naimas met, piman.

'Maykayon ta pagraramanan ti adda, karruba!

[wwwmangantayonkarruba.blogspot.com]

Pinakbet a saluyot

Daytoy mammet, daytoy man ti isublat nga ikammet iti innapuy: pinakbet a [puro] bulong ti saluyot a nasagpawan iti sangkalilit a daing ken bungat' sili a sairo.

Ay wen, nabayag la ngamin daydi naudi a sakmolko ti kastoy a sida. Paganusan manen, a.

Ala wen, 'maykayon ta pagraramanan ti grasia piman...

[wwwmangantayonkarruba.blogspot.com