Batso a Karabasa ken adda metten burluloyna

Naglutoak ti batso [bacho] a karabasa a naigisaran iti lasag ken taba ti baboy, adda bassit pasayang ken bungat’ utong a laokna—- ken pangay-ayo metten iti agik-ikkis a tian, piman.

No maibus, nasayaat. No saan, di saan. Basta.

[wwwmangantayonkarruba.blogspot.com]

Nateng ken lames ti sida

Ay! Nanumo laeng a sida ita nga aldaw: digo ti nateng— bulong ti marunggay, bungat’ okra [saluyot-kayo] ken paria, ken adda metten sidekick-na a liningta a mataan [akule], piman.

Makaanayen daytoy a mangpasidap ken mangasa iti panunot ken mangpatibker pay ti pisikal a bagi nangruna kadagiti pada a mangrabrabii nga agtrabaho.

'Maykayon ta pagraramanan ti adda a sida, karruba!

[wwwmangantayonkarruba.blogspot.com]

Idumudom iti bugguong a bunga ti okra

Daytoy ti sidaek ita, nailamaw nga okra. Idumudomko iti naperresan a tubbog ti kalamansi a bugguong ken nalaokan bassit iti lakaylakay. Makaanayen daytoy a sida dagiti pada a taga-away ta nabaknang iti protina, fiber ken aprodisiak.

Letson Baboy

Nasaripatpatak man a manarimaan ti luto da Pare Dante Rayo, alias "Pobreng Dukha" ken dagiti komparena iti letson baboy. Ket daytoy, pinadigoannak man. Gemasen nga isawsaw iti nakamatisan a bugguong, wenno patedtedan iti Mang Tomas, wenno ketsap.

Ngem bayat ti innak pannangan, ay-ayek manen ti bagik, piman. Agmaymaysa a mangmulmulagat iti taraon a kunam la no ti nakadasar a taraon ti manglamut kaniak. Anian, naimas ti taraon ngem awan met ganasko a mangan. Pimpiman.

Kasta a talaga. Masapul nga iruamen ti bagi...

[wwwmangantayonkarruba.blogspot.com]