Bukod a bersion. Bukod a partuat ken takuat. Bukod nga estilo ti luto. Bukod a ramen. Naglutoak ket pinadasko ti nageksperimento. Resulta, mayat! Daytoy ti "Igadobusit" wenno Igado ken Adobo a Pusit. Naigisaran bassit iti taba, karne ken dalem ti baboy ken naparabawan iti green peas. Piman ngem anusan latta.

Igadobusit [Igado ken Adobo a Pusit]

Adobo a [puro] kukod/saka ti baboy ti nagammatak a linuto a masida. Natempla iti bassit a suyo, cooking wine, adobo mix, sangkakutsara a sukang iloco, bulong ken bukel ti pamienta, bawang ken nasagpawan iti sangkabassit a piraso ti carrots. Ay, nanumo latta, piman!

Adobo a [puro] kukod ti baboy

[Na]Bugguong a tukmem/bennek [clams] ti nagammatan nga ipangan iti innapuy, piman. Uray nangina ti bayad ti sanga-ziploc, inkidemen, a, ayat la a makaraman. Makapailiw ngamin ti agsida ti kastoy a klase ti taraon. Kas ka la adda iti ili a nakayanakan. Ay, anusan, a, piman!

[Na]Bugguong a tukmem/bennek [clams]

Pupos/Pulotan nga adobo a [puro] batikuleng ti manok uray awan mainum a beer wenno arak, mayat latta. Pagipapasan, a, a pidutpidoten nga isakmol ana pay ngarud, piman.

Adobo a [puro] batikuleng ti manok

Kaldo, kaldo. Ay wen, kaldo latta ti ipangan, piman. Anusan, a, ti pinapaitan/paksiw a [puro] karne ti baka a nasagpawan iti bungat' sili. Naimas ken pagpapigsa daytoy dagiti pada nga agtartrabaho iti rabii.

Pinapaitan/Paksiw a karne ti baka

Hus! Daytoy lattan ti sidaen, adobo a pusit [calamari] a nasagpawan iti bungat' sili. Nanumo, nanumo latta ken anusanen, a, piman.

Adobo a pusit [calamari]

Batso a bungat' tabungaw a naigisaran iti karne/taba ti baboy a nalaokan iti tallo piraso a shrimps ken nawarakiwakan iti bassit a natadtad a bulong ti lasona ti napili a taraon ita a natutudo ditoy batog a langit. Nanumo ngem anusan...

Batso a bungat' tabungaw

Food Trip: Lumpia a bungat' sili. Bukod a bersion. Bukod nga estilo. Bukod nga eksperimento...

Lumpiang Sili

Dinengdeng a bulong ti marunggay/marunggi, bungat' tarong, susop ti saba a naparabawan iti naprito a tilapia. Ania ketdi nga imasnan ti maragatas a digona, piman.

Dinengdeng