Daytoy pay ti naimas a masida no maituredmo, ginisar a bungat' paria iti bassit a mantenka samo isawsaw iti bugguong a naperresan ti kalamansi. Kastoy ti sidami no mapanak mamalon idi kadagiti agraep iti talonmi. Maipakita lang a nanumo a talaga ti masida dagiti adda iti nasulinek a lugar, piman...

Naigisar a bungat' paria iti bassit a manteka

Nanumo ngem nasustansia a taraon. Wen daytoy man ti inar-arapaapko a masida, adobo nga uong.

Adobo nga uong

Daytoy lattan ti piman a natiliwko a linuto, batso a bungat' karabasa a pinarabawak iti walo pedaso a shrimps, bungat' utong ken karne/tabat' baboy. Ana pay no di anusan, piman...

Batso a bungat' karabasa

Daytoy man piman ti intugotko a nayon a kinnanmi kadagiti katrabahuak idi rabii, prito a tilapia a napabarawan iti lakay-lakay [napagtipon a natadtad a bungat' sili ken bawang] ken bulong ti lasona. Perme a ginusto dagiti boksitmi. Saan a pinakawan ti ngiwatmi. Perme a naikiras, piman...

Prito a Tilapia

Mangantayo latta, Karruba. Anusan, a, ti nanumo a masida a sinigang a bangus a naparabawan iti shrimps, green pepper, bunga/bukel/bagas ti aba ken bassit a bulong ti lasona. 'Maykayon ta pagraramanan ti adda piman...

Sinigang a Bangus

Daytoy lattan ti pangaldaw piman, pakbet a bulong ti bawang ken bungat' patani a nalaokan bassit iti sitsaron baboy. Narigat met no puro karne ti masida ta kakaasi langaruden ti palaypalay ti sakak iti kaga-gout, piman. Anusan, a. Ne, 'maykayon ta pagraramanan, Karruba!

Pakbet a bulong ti bawang a nalaokan iti bungat' patani ken sitsaron baboy

Daytoy ti pangaldawtayo piman, sinigang a lames a Yellow Stripe Trevally; naparabawan iti shrimps, bulong ti lasona ken green pepper. Anusan, a, ta isu met ti adda

Yellow Stripe Trevally

Hus! Daytoy lattan, a, ti pangrabii. Natuno a bungat' sili. Naigilapan iti sangkabassit a kamatis ken napatedtedan iti bugguong. Anusan, a, piman.

[Natuno a bungat' sili]

Kannayon ti pangaldaw ti Tilapia fillet a nasagpawan iti bulong ti lasona ken lakay-lakay [natadtad a bungat' sili a nailaok iti natadtad met laeng a bukel ti bawang].

Tilapia Fillet

Daytoy ti pangaldawko piman, dinengdeng/inabraw a bungat' patani, kabatiti, bulong ti marunggay/marunggi a nasagpawan iti aramang. Anusan, a, piman, ta napia la a kired numuna ta aguyek ken agpanateng datao...

Dinengdeng/Inabraw a bungat' patani, kabatiti, bulong ti marunggay/marunggi ken aramang

Gitayko la inalunos amin daytoy adobo a tahong/kabia a pinangaldawko, piman. Ket tapno adda met nateng a laokna, inggalipak iti sangkabassit a kayo ti pechay ken nawarakiwakan iti bulong ti lasona

Adobo a tahong/kabia