Kilawen a dumadara

 

Daytoy mammet pagpapasan, uray sagpaminsan laeng

tapno di pimpiman datao.

Ala wen, kilawen [presko] a dumadara a maidumudom

iti suyo [kikoman], suka, naartem a bungat' sili

ken adda bassit pulagidna a wasabe.

Saan a para pulotan no di nayon ti sida. Umanayen

a pangpaimas ti pangan ti gasangna.

'Maykan, karruba!

[wwwmangantayonkarruba.blogspot.com]

Presko a pancit

 

Bukod nga estilo a panagluto iti presko a pancit.

Awan adu a rekado a nailaok ngem kaustoan laeng

a raman iti panagtempla ti nangisit ti sikona.

Anusan ta saan a pangkomersial. Ketdi, daytoy ti

aw-awaganda iti "pancit for life," piman.

[wwwmangantayonkarruba.blogspot.com]

Adobo a bagbagis ti baboy

 

Ket wen, sagpaminsan met a ramanan ti taraon nga iparit

ti doktor kadagiti pada nga adda an-anayenna a gout. 

Nupay kasta, impankon a rikna ti nagluto iti adobo

a bagbagis ti baboy. Narigat met lattan nga iyapal ti boksit

a di makaraman iti maysa a paggugusto a taraon a sidaen 

dagiti pada a nangisit ti sikona. Ket no bilang di 

maatipa ti yaatake dayta a sakit, baam man. Total,

adda met sindadaan nga agas a tomaren, piman.

Ala wen, tira latta, karruba!

[wwwmangantayonkarruba.blogspot.com]

Nateng ken pasayang, adda pay taba ken lasag a laokna

 

Daytoy ti nanumo a sida: okra [saluyot-kayo] ken bungat’ utong a nagisar iti taba ken lasag ti baboy, ken nasagpawan sangkabassit iti pasayan[g]. Ala wen, anusan. Piman.

'Maykan, karruba!

[wwwmangantayonkarruba.blogspot.com]

Imbaliktad a pasayang

 

Yantangay agmaymaysaak manen a sumango iti 

lamisaan iti daytoy nalulem nga aldaw, 

daytoy siguron ti kaalistoan a luto-

imbaliktad a pasayang. Iti ababa a pannao,

nagisar iti bassit a manteka ti pasayang.

Tinemplak iti cooking wine, bassit a ginisa mix,

bawang ken sibuyas. 

Ala wen, anusan. Manso, tira! 'Maykan, karruba!

[wwwmangantayonkarruba.blogspot.com]

Ramanan ti chicharon bulaklak

 

No dadduma, yapalko man ti bagik a di makasida

ti kastoy a taraon, uray sagpamisan man lang, kunak.

Uray ammok nga agalekto manen ti sakit iti palaypalayko.

Ngem 'nia ngarud ti maris ti biag no di padasen uray pay 

dagiti iparit ti doktor a sidaen yantangay adda met

agasna, hehe. 

Maliklikak aya a di gumammat ken mangisakmol

daytoy a sida a "chicharon bulaklak" a kunada

iti tagalog? Imasen a nanamen ti imas ti sida

ngem ikidem ti ut-ot a marikna iti saka...

'Maykayon ta pagraramanan, karruba!

[wwwmangantayonkarruba.blogspot.com]