Daytoy pay ti naimas a kaldo dagiti pada a mangrabrabii nga agtrabaho, paksiw a karnet' baka. Kaimasna aglalo no umas-asuk pay la piman. Pagpapigsa nangruna iti susuop ken tulang.

Paksiw a karnet' baka

Daytoy ti pamedped iti bisin, piman: nalingta a lames a dumadara. Naimas ken nasustansia. Naparabawan iti bungat' sili. Natempla iti suka ti Iloco, ginisa mix, bassit a suyo, bawang, asin ken bukel ti pomienta. Anusanen, a, piman.

Nalingta a lames a dumadara

Inyasmangak man iti bukel/bungat' patani ti linutok a lauya wenno nadiguan a kukod/saka ti baboy. Pinarisak pay iti lakay-lakay [natadtad a bungat' sili ken bawang] tapno naim-imas ken naganas ti kaan, Kaka. Perme a pagling-etennaka. Naimas a kaldo piman nangruna kadagiti pada nga agtartrabaho iti rabii. 'Maykayon ta arisubsobentayo!

Lauya/nadiguan a kukod/saka ti baboy

Daytoy ti iparehak iti sinigang a lames a Dumadara. Tanggadek koma pay la ti agsida iti karne ngem napigsa ti awis daytoy nagtagipayak a masida. Hanabale kunak ta agserbi met iti boksit, piman. 'Maykayon, a!

Adobo a Manok

Daytoy man ti nanumo a kaldo ita nga aldaw, sinigang/paksiw a lames a Dumadara. Kadakami a taga-Laoag wenno Norte, sinigang kunami ti madiguan a lames; paksiw kunami met no karne. Ngem kadagiti kabangibang a probinsia, paksiw kunada iti sinigang a kunami. Ngem ala, sinigang wenno paksiw, 'maykayon ta pagraramanantayo nga igupen 'toy kalluto a sinigang a Dumadara. Kaimasna ta napudot pay, ne.

Sinigang a Dumadara

Medyo anemic daytoy linutok a batso a balatong. Nakamulagat lattan a batso ti bukel ti balatong a naigisaran bassit iti karnet' baboy ken bawang sa nasagppawan iti aramang ti masida ita nga aldaw. Awan met makitak a bulong wenno kumporme a nateng koma a pangyasmangak ti batso, piman. Nupay kasta, anusan, a. Pagyamanan ketdi ta adda pamedped iti bisin...

Batso a bukel ti balatong [mongo]

Tabtaba kunami daytoy idiay Laoag. Kunada a rugit ti daga, ngem dida ammo a naimas ken nasustansia a taraon nangruna no maperresan iti kalamansi wenno matempla iti bugguong ken suka, matadtadan iti bawang ta kitaem man, Kaka. Ala wen, anusan daytoy a masida. Ta uray awanak idiay Ilocos, kaslaak adda metten sadiay no maramanak daytoy tabtaba...

Tabtaba

'Maykayon ta pagraramanan a sidaen daytoy ginettaan a kayot' aba a nasagpawan iti sangkabassit nga aramang. Baam man ta gagatel basta makaraman iti kastoy. Nabayag la daydin naudi a pannakaraman iti aba, piman. Ala, 'maykayon, ne!

Ginettaan a kayot' aba

Nangtuno/naisarabasab a karnet' baboy napia la a pamedped ti bisin. Wen, sagpaminsan met la nga agsidatayo iti kastoy, piman...

Natuno a karnet' baboy

Pangaldaw manen, piman. Daytoy lattan inabraw a bungat' kabatiti ti anusan a taraon.

Inabraw a bungat' kabatiti

Hus! Daytoy lattan piman ti pangaldaw, homemade cooked Fried Chicken. Awan mabalin ta isu ti natiliw a naluto. 'Maykayon ta pagraramanan, crispy ken nananam...

Homemade cooked Fried Chicken [thigh and wings]