Nakapupok iti lata ti sida ita

Masadutak nga agsukain ti maluto iti pagpupokan isu a daytoy lattan ti napidutko a pangalistuan a linuto-- nagisar nga spam iti bassit

a manteka a nailudonludon iti kamatis ken sibuyas, nawarakiwakan ti sangkalilit a bulong ti lasona ken napatedtedan iti cooking wine a pagpabanglo.

Kasta siguro no nagpuyat ti tao, saanen a nasken nga agipauneg ti naimas a sida basta adda pangap-ap iti mabisinan a tian, piman.

Ala wen, la. 'Maykan ta ikirasta, karruba!

[wwwmangantayonkarruba.blogspot.com]

Bungat' paria ken kardis

Nanumo a sida ngem anusan, piman.

Wen, nagisar iti sangkabassit nga iwa ti lasag ken taba ti baboy. Kalpasan a nagmanteka, nailudon a nailaok ti bungat' paria ken kardis. Nakamatisan, naikkan sibuyas, napatedtedan ti suyo ken nadikdikan iti sitsaron baboy. Huston, umanayen a pangap-ap iti agik-ikkis ken nabisinan a tian a nagpuyat iti trabaho. Kasta a talaga...

'Maykan, karruba!

[wwwmangantayonkarruba.blogspot.com]

Liningta a Mataan

 

Daytoy ti nanumo a sida a kasangok iti lamisaan ita: liningta a mataan [akule]. Isu met ngamin ti nakammelko iti nalamiis a pagpupokan. Anusan ta naimas met, piman.

'Maykayon ta pagraramanan ti adda, karruba!

[wwwmangantayonkarruba.blogspot.com]

Pinakbet a saluyot

Daytoy mammet, daytoy man ti isublat nga ikammet iti innapuy: pinakbet a [puro] bulong ti saluyot a nasagpawan iti sangkalilit a daing ken bungat' sili a sairo.

Ay wen, nabayag la ngamin daydi naudi a sakmolko ti kastoy a sida. Paganusan manen, a.

Ala wen, 'maykayon ta pagraramanan ti grasia piman...

[wwwmangantayonkarruba.blogspot.com

Prito a mataan

Hu! Daytoy man prito a mataan [akule] ti pagpapasan nga ikammet iti innapuy. Idumudomko iti suyo a naperresan ti kalamansi nga adda laokna a lakaylakay ken naarten iti suka a bungat' sili ti sairo.

Makaanayen a pangimas ti pangan. 'Maykan, karruba!

[wwwmangantayonkarruba.blogspot.com]

Nateng latta ti sida

Dagitoy ti agpapareha ita: bulong ti marunggay, bungat’ tarong ken utong. Daytoy ti kaimasan a digo nga igupen dagiti pada a mangrabrabii nga agtrabaho ken no kastoy nga aglulemlulem ti tiempo ken kasla kayatna nga ibuyat ti tudo. Nasustansia, ngem ala, anusan.

Ken adda pay nayonna-- salad a pechay [bulong ken kayo] a nakamatisan, naigilapan ken natadtadan ti sibuyas ken laya, nalaokan iti bassit a bugguong ken vetsin. Nateng latta ngem nagimas man nga ikammet iti innapuy.

‘Maykayon ta pagraramanan ti nanumo a sida, karruba!

[wwwmangantayonkarruba.blogspot.com]

Ginataan nga aba

 

Inasmangak man ti linutok a dinengdeng iti ginataan nga aba. Linaokak bassit iti nagisar a lasag ken taba ti baboy ken nasagpawan ti daing.

Mayat a kombinasion ta mabalanse ti lasag/taba iti nateng. Ket ana pay ngarud no di anusan ti masida, piman.

'Maykayon, karruba!

[wwwmangantayonkarruba.blogspot.com]